Përballë Shqipërisë më 7 shtator, Portugalia ka shansin të hedhë një hap të rëndësishëm drejt Europianit 2016. Por Nani, një prej yjeve të skuadrës luzitane, vlerëson kuqezinjtë e De Biasit, që sipas tij janë rritur në vitet e fundit.
“Do të jetë një sfidë e komplikuar. Kohët e fundit, Shqipëria ka regjistruar rezultate të mira. Përballë tyre luajtëm në fillim të eliminatorëve dhe treguan që praktikojnë një futboll të bukur. Nuk presim të jetë e lehtë, pasi shqiptarët luajnë në shtëpi”.
Thuajse një vit më parë, Shqipëria regjistroi suksesin historik 1-0 në Aveiro të Portugalisë. Trajneri Bento u largua, ndërsa në vendin e tij u emërua Fernando Santos. Me teknikun e ri, luzitanët i kanë fituar katër ndeshjet e luajtura dhe kryesojnë Grupin I, ndërsa mesfushori i Fenerbahçes vlerëson ecurinë.
“Rezultatet kanë qenë të mira dhe dëshirojmë të vazhdojmë në këtë rrugë. Skuadra ka më tepër ndeshje së bashku dhe ka fituar besim. Shpresoojmë të ruajmë formën e mirë të ndeshjeve të fundit”.
Përpara duelit me Shqipërinë në “Elbasan Arena”, të premten Portugalia zhvillon miqësoren me Francën në stadiumin ” Jose Alvalade”.
