Pjesëmarrja e kryeministrit Isa Mustafa, në Samitin e Investimeve të Ballkanit Perëndimor, të organizuar nga Banka Evropiane për Rindërtim dhe Zhvillim (BERZH) në Londër, do ta shtyjë zgjedhjen e presidentit të vendit.
Burime të “Republika24” brenda koalicionit qeverisës kanë konfirmuar se kryeministri Mustafa të mërkurën do të kthehet në Kosovë, dhe po këtë ditë është paralajmëruar se do të mbahet seancë plenare, por nuk do të mund të votohet presidenti, pasi partnerëve të koalicionit do t’u duhet edhe dy ditë kohë për përgatitje. “Të enjten Kryesia e Kuvendit do të mbajë mbledhje dhe pritet ta caktojë seancën për zgjedhjen e presidentit për të premten ose eventualisht të dielën”, kanë konfirmuar këto burime.
Zyrtarët e PDK-së në deklarimet e tyre nëpër medie po thonë se koalicioni qeverisës i ka votat për ta zgjedhur Hashim Thaçin president.
Por çfarë do të ndodhë nëse koalicioni qeverisës nuk do të mund ta zgjedh presidentin.
Data e fundit për zgjedhjen e presidentit është 7 marsi i këtij viti. Sipas nenit 86 të Kushtetutës, që sqaron mënyrën e zgjedhjes së presidentit dhe kuorumin e nevojshëm, gjatë seancës për zgjedhjen e kreut të shtetit duhet të jenë së paku dy të tretat e deputetëve të Kuvendit, apo 80, nga 120 deputetë sa janë gjithsej. Nëse asnjë kandidat nuk merr shumicën e votave, prej dy të tretave të deputetëve, në dy votimet e para, organizohet votimi i tretë mes dy kandidatëve, të cilët kanë marrë numrin më të lartë të votave në votimin e dytë dhe kandidati që merr shumicën e thjeshtë të votave të të gjithë deputetëve, apo 61 prej tyre, zgjedhet president i Kosovës. Ndërkohë, nëse edhe në votimin e tretë asnjë kandidat nuk arrin t’i marrë votat e nevojshme për t’u zgjedhur president, shpërndahet Kuvendi dhe shpallen zgjedhjet e reja, të cilat duhet të mbahen brenda 45 ditëve.
/Republika24/
