Kryeministri i Kosovës, Albin Kurti, pak para nisjes për në Paris ku do të marrë pjesë në Forumin e Paqes, ka thënë se në tavolinë janë dy propozime për të ecur para në raport me Serbinë.
Sipas tij, propozimi i parë është i tiji, ai për kornizën e përgjithshme të marrëveshjes dhe propozimi i dytë, ai franko-gjerman, teksa paralajmëroi një takim të mundshëm trilateral mes tij, presidentit serb, Aleksandar Vuçiq, dhe presidentit francez, Emmanuel Macron.
“I kemi dy propozime në tavolinë: ai imi për kornizën e përgjithshme të marrëveshjes i prezantuar në takimin e 18 gushtit 2022 në Bruksel, si dhe propozimi franko-gjerman që ka mbështetjen e Shteteve të Bashkuara të Amerikës dhe Bashkimit Evropian, i prezantuar nga emisarët Jens Plötner dhe Emmanuel Bonne”, ka shkruar Kurti, transmeton Klankosova.tv.
Tutje, ai tha se dialogu parimor me të tjerët, sundimi i ligjit njësoj për të gjithë dhe paqja e siguria në tërë territorin, shkojnë bashkë.
I pari i qeverisë tha se në Forumin e Paqes, me ftesë të presidentit të Francës, Emmanuel Macron, do të jetë bashkë me gruan e tij, Ritën dhe gjashtë anëtarë të kabinetit të tij.
E lidhur me këtë ka folur edhe profesori i diplomacisë Valon Murtezaj.
Murtezaj tha në Edicionin Speciale në Klan Kosova se duhet të përfundojnë deklaratat e tipit nuk ekziston “plani franko gjerman.
“Ajo se çka është e rëndësishme është që pala kosovare të jetë e përgatitur dhe te jetë serioze. Pra, përderisa javët dhe muajt e fundit kemi pasur deklarate jokonsistente “Nuk ekziston ky plan”, “Ekziston një plan tjetër por nuk është ky” etj, pra kjo lojë fjalësh duhet të vijë duke përfunduar. Dhe është e rendësishme që Kosova të avancojë në interesant e tjera nacionale”, tha Murtezaj në Edicionin Special në Klan Kosova.
