Dardan Molliqaj dhe tre persona të tjerë, aktivistë të Lëvizjes Vetëvendosje, pritet të përballen me ligjin për veprimet e tyre prej huliganësh të kryera gjatë protestës të së mërkurës në qendër të Prishtinës. Ata po hetohen për shkak të nxjerrjes nga vetura të Zyrtarit të Ministrisë së Bujqësisë dhe demolimit të veturës së tij.
Prokuroria Themelore e Prishtinës ka nisur hetimet ndaj katër personave të dyshuar për veprime të dhunshme dhe dëmtim të pronës gjatë protestës së partive opozitarë të mbajtur një ditë më parë në kryeqytet, pas arrestimit të deputetes së AAK’së, Donika Kadaj-Bujupi dhe caktimit të masës së paraburgimit prej 30 ditësh ndaj saj.
Në mesin e këtyre personave që po hetohen për kanosje të personit zyrtar dhe dëmtim të pronës, siç mëson Gazeta Express, është edhe sekretari organizativ i LVV’së, Dardan Molliqaj.
“Prokuroria Themelore në Prishtinë ka filluar hetimet edhe për 4 të pandehur të tjerë për veprat penale: “Shtrëngimi” nga neni 195 par.3 nën par. 3.1, i Kodit Penal të Republikës së Kosovës dhe “Asgjësimi apo dëmtimi i pasurisë” nga neni 333 par. 1 lidhur me par. 2 lidhur me nenin 31 të Kodit Penal të Republikës së Kosovës”, thuhet në konfirmimin e Prokurorisë Themelore për hapjen e këtyre hetimeve.
Molliqaj dhe tre shoqëruesit e tij, në rast se ngrihet aktakuzë ndaj tyre, mund të dënohen nga gjashtë muaj deri në 5 vite heqje lirie për veprën penale “kanosje ndaj personit zyrtar” dhe deri në një vit burgim për veprën tjetër penale “Asgjësim apo dëmtimi i pasurisë”, sipas Kodit Penal të Republikës së Kosovës.
Mirëpo, Molliqaj dhe bashkëpunëtorët e tij shumë shpejt mund të përballen edhe me kallëzim penal nga këshilltari i MPB’së, Shasivar Haxhijaj, për veprimet e dhunshme të kryera ndaj tij mbrëmjen e së mërkurës.
Gazeta Express merr vesh se gjatë ditëve në vijim Haxhijaj do ta dërgojë në prokurori padinë e tij zyrtare ose private ndaj personave që e ‘dhunuan’ dhe demoluan veturën e tij zyrtare.
Lidhur me ngjarjet e ndodhura të mërkurën në Prishtinë, Prokuroria Themelore e Prishtinës ka kërkuar masën e ndalesës prej 30 ditë paraburgim edhe ndaj 17 personave të arrestuar gjatë protestës së dhunshme me dyshimet se kanë kryer vepër penale duke qenë pjesëmarrës në turma që kryen veprime huligane. /GazetaExpress
