Ministria e Mjedisit, Planifikimit Hapësinor dhe Infrastrukturës (MMPHI) ka apeluar te qytetarët që të tregojnë kujdes të shtuar gjatë vozitjes në ditët me mjegull, për shkak të dukshmërisë së reduktuar dhe rritjes së rrezikut për aksidente në trafik.

Përmes një komunikate, ministria ka kërkuar nga drejtuesit e automjeteve që të përshtatin shpejtësinë me kushtet e rrugës, të mbajnë distancë më të madhe nga automjetet përpara dhe të përdorin dritat e mjegullës në përputhje me rregullat e komunikacionit.

Po ashtu, MMPHI u ka bërë thirrje shoferëve që të shmangin parakalimet e panevojshme, të sinjalizojnë me kohë çdo veprim dhe të qëndrojnë të përqendruar gjatë gjithë kohës gjatë drejtimit të automjetit.

“Siguria juaj dhe e pjesëmarrësve të tjerë në trafik është prioritet. Kujdesi i shtuar shpëton jetë”, thuhet në komunikatën e ministrisë.