Gjykata e Apelit sot do ta shqyrtojë ankesën e avokatëve për rastin “Drenica I”, ndërsa pala mbrojtëse shpreson se kjo gjykatë do të vendosë sipas standardeve ndërkombëtare dhe do t’i shpallë të pafajshëm ish-komandantët e UÇK-së, Sylejman Selimin dhe Sami Lushtakun.
Tomë Gashi, avokat i ish-komandantit të Shtabit të Përgjithshëm të UÇK-së, Sylejman Selimi, shpreson në një aktvendim lirues të gjykatës për klientin e tij.
Sipas Gashit, klienti i tij është dënuar pa asnjë provë. “Dje Kosova festoi Ditën e Evropës, ndërsa nesër fillon seanca gjyqësore në Gjykatën e Apelit në Prishtinë sipas ankesës së avokatëve në rastin e ish-komandantit të Shtabit të Përgjithshëm të UÇK-së, Sylejman Selimit, ish-komandantit të Zonës Operative të Drenicës, Sami Lushtakut, si dhe komandantëve dhe ushtarëve të tjerë në rastin e njohur si ‘Drenica I’. Mbrojtja e z. Sylejman Selimit shpreson se Gjykata e Apelit do të vendosë sipas standardeve të Evropës dhe do t’i shpallë të pafajshëm z. Sylejman Selimin, z. Sami Lushtakun dhe të tjerët, sepse ata pa asnjë provë e në kundërshtim me standardet evropiane të drejtësisë dhe të gjykimit të drejtë u shpallen fajtorë në muajin maj të vitit 2015 për vepra të cilat nuk i kishin kryer”, ka vlerësuar Gashi.
Ai ka deklaruar se ky rast do të tregojë shumë për raportet në mes të Kosovës dhe BE-së. “Politikanët tanë dhe të Evropës po thonë se tanimë jemi shumë afër Evropës. Ky rast dhe rasti ‘Drenica II’, që po ashtu është caktuar në Gjykatën e Apelit më datën 16 maj 2016, do ta vërtetojnë apo demantojnë afërsinë e Evropës me Kosovën sa i përket sundimit të ligjit, sepse në Evropë nuk do të duhej askush të shpallej fajtor për veprat që nuk i ka kryer apo pa asnjë provë kredibile. Ky standard i drejtësisë do të duhej të vlente edhe në Kosovë, do të duhej të vlente edhe për ish-pjesëtarët e UÇK-së, sepse Kosova është Evropë”, është shprehur Gashi.
Edhe avokati i Sami Lushtakut, Arianit Koci, beson se klienti i tij do të shpallet i pafajshëm. Në një deklaratë për “Epokën e re” ai ka treguar se në ankesë ka paraqitur argumente të fuqishme lidhur me pafajësinë e ish-komandantit të UÇK-së. “Unë dhe klienti im besojmë në drejtësi dhe jemi të bindur se kolegji gjyqësor i përbërë prej gjyqtarëve të EULEX-it dhe gjyqtarit vendor do të marrë vendim të drejtë dhe të ligjshëm. Në ankesë kam paraqitur argumente të fuqishme lidhur me pafajësinë e z. Lushtaku. Prandaj, besoj se do të aprovohet”, ka thënë Koci.
Më 27 maj Gjykata Themelore në Mitrovicë, dy ish-komandantët e UÇK-së, së bashku me disa ish-bashkëluftëtarë të tyre, i ka dënuar me dhjetëra vite për krime lufte. Sylejman Selimi është dënuar me 14 vjet burgim, ndërsa Sami Lushtaku me 12 vjet.
