“Ku je more ku je”, është kjo thirrja kumbuese e dëgjuar nga malësorët e Rugovës. Kështu komunikonin ata ndërmjet vete nga një kodër në tjetrën.
Por, sot kur thërrasin, mund të mos i dëgjoj askush. Aq më tepër kur këto bjeshkë tashmë janë bërë çështje politike. Madje edhe kjo e fundit nuk ia vë veshin britmave të malësorëve.
E njohur si Gurrat e Bardha, është maja e njërës prej kodrave të Rugovës ku banorët i kanë varret e familjarëve.
Në pamundësi që t’i varrosnin në fshat, rugovasit e ndjerë tash prehen në atë që për të gjallët është kufiri i Kosovës me Malin e Zi.
“Këto varreza kanë mbet 6 km në thellësi të Malit të Zi sipas demarkacionit të ri. Kjo thirret Qafa e Gurrave të Bardha”, thotë njëri nga banorët.
“Motrat e babës kur kanë qenë të vogla, nuk kanë pas mundësi me i çu të vdekurit në fshatin e tyre dhe i kanë varros këtu. E këto tash kush me ardh me i vizitu. Tash po i merr Mali i Zi, por ne nuk i japim kurrë me emër të Zotit”, thotë një tjetër.
Krejt në fund malësorët i thonë edhe këngës.
