Ekonomisti Lumir Abdixhiku ka reaguar ndaj protestës së sotme të opozitës duke thënë se në ballë të këtyre protestave kishte edhe nënshkrues kontratash korruptive, falës të aseteve publike, punësues familjarësh në secilin vend.
“Pra zaptuesit vet – sot mbajnë moral për kapjen. Këta kapjen nuk kan hall; hall kanë se nuk janë më kapës vet. Protesta nuk ushqen harresën; ajo nuk amniston pra askend. Ne megjithatë mbajmë mend”, ka shkruar Abdixhiku.
Lexojeni të plotë reagimin
E mbështes protestën (paqësore gjithsesi) sepse indiferenca dhe ftohtësia e pushtetit përballë skamjes, mjerimit, korrupsionit e zaptimit nuk pranohet hiç. Kjo protestë mbronë në mënyrë krejtësisht legjitime interesat e secilit kosovar. Përtej secilës bindje partiake, ajo për mua mbetet e drejtë. Ç’kapja sot është mision patriotik!
Por ama, (konsideratë për përjashtimet shumicë) kur shoh se si ç’zaptues të rendit të parë shpërfaqen zaptuesit më tipik, të njëjtit që deri dje kapën shtetin vet, këtë s’mund ta pranoj assesi. Hipokritë shembullorë.
Nënshkrues kontratash miliardëshe e korruptive (të mosbëra transparente asnjëherë), falës të aseteve publike, tenderashë e politiko-milionerë, bashkëpartnerë me kapësit gjithandej, punësues familjarësh e militantësh në secilin vend, pra zaptuesit vet – sot mbajnë moral për kapjen. Këta kapjen nuk kan hall; hall kanë se nuk janë më kapës vet. Protesta nuk ushqen harresën; ajo nuk amniston pra askend. Ne megjithatë mbajmë mend!
