Lidhur me situatën e krijuar në Degën e PDK-së në Drenas, Ramiz Lladrovci ka dhënë një opinion ku ka theksuar se përvojën e Ushtruesit të detyrës nuk do ta përsërisë.
Ai tha se vendimi i cili është në fuqi nga viti 2025 e lëndon meritokracinë, kontinuitetin dhe arritjet e Degës me anëtarësinë besnike.
Postimi i plotë:
Përvojën e Ushtruesit të detyrës nuk do ta përsëris!
Në rrethanën e krijuar lidhur me degën e Partisë Demokratike të Kosovës në Drenas, pas dorëheqjes së kryetarit të emëruar Ushtrues detyre, kam pranuar shumë mesazhe përkrahëse nga qytetarët, anëtarësia si dhe pyetje nga mediat se a po kthehem kryetar i Degës.
Nuk pretendoj të bëhem sërish ushtrues detyre i kryetarit të Degës së PDK-së në Drenas e as të jem i emëruar me vendim nga Kryetari, deri sa është në veprim vendimi i vitit 2025, i cili autorizon Kryesinë të bëj votime për kandidaturat e kryetarëve të komunës. Ky vendim e lëndon meritokracinë, kontinuitetin dhe arritjet e Degës me anëtarësinë besnike.
Një herë kam pranuar të jem ushtrues detyre, të dytën herë, nuk e bëj. Këtë përvojë, nuk do ta përsëris.
Më 2021, kam pritur të respektohet vendimi i Kryetarit të PDK-së, i cili me mekanizmat partiak e vlerëson dhe propozon kandidaturën, por, jo edhe votim duke e hedhur përgjegjësinë në skemat për të ndëshkuar apo shpërblyer ndonjë kandidat.
Dorëheqja e Ushtruesit të detyrës as më ka afruar e as më ka larguar nga PDK.
Kam qenë, jam dhe mbetem në PDK, kam theksuar kështu nga dita kur votat në Kryesi kishin vendosur kundër meje, kohë kur në zgjedhjet e fundit qendrore si Ushtrues detyre i kryetarit dhe Shef i shtabit zgjedhor kishim marrë 19.614 vota dhe isha shtatë herë i shpallur kampion i performancës.
E kam deklaruar shumë herë edhe vite më parë se nuk kam pretendime për ta udhëhequr Degën e PDK-së në Drenas. Kam kërkuar që të mos jem as në kryesi dhe në vendin tim të emërohet ndonjë i ri apo e re nga komuna jonë.
Tash nuk kam pritur veprime të vonuara dhe porosi çorientuese apo përçarëse ndaj bastionit të PDK-së. Fitorja ime më 12 tetor, dhe PDK-së më 28 dhjetor, nuk ishin rastësi, këtë duhet ta dinë edhe ata që i kisha dhe i kam kundër në parti e në Komunë.
Sot, përkundër zërave që thonë se “u lirua rruga” dhe tash Unë mund ta udhëheqë Degën dhe Shtabin për zgjedhjet e 7 Qershorit, nuk e marrë afër zemrës.
Dështakët nuk mund të promovojnë e as të tregtojnë vizione për PDK-në. Ata mund të marrin rroga në kryesi, por, mësimet e lavdërimet i kanë bajate.
Kontributi im dhe të gjithë asamblistëve tanë, të drejtorëve të komunës, me nëndegë, shtabet lokale, simpatizantët dhe anëtarësinë gjithëpërfshirëse, si asnjë herë më parë, do të jemi të mobilizuar për fitoren e PDK-së dhe kandidatëve të PDK-së në komunën e Drenasit dhe më gjerë.
Mbrëmja e 7 Qershorit do të jetë krenare në komunën e Drenasit me jehonë deri te heronjtë tanë të luftës dhe paqes.
