Luan Dalipi, shef i stafit të Kryeministrit Albin Kurti, ka reaguar ashpër ndaj disa lajmeve të publikuara në media për përfshirjen e tij apo të familjarëve të tij në përfitime të padrejta nga licencimi për tregti me energji.
Në një deklaratë publike, Dalipi i cilësoi këto raportime si “trillime dhe insinuata dashakeqe” nga portale dhe politikanë opozitarë, të cilët – sipas tij – janë rritur në një kohë kur korrupsioni ishte normë.
Ai theksoi se po tentohet të krijohet një barazim i padrejtë midis qeverisjes së tanishme dhe qeverive të mëparshme të korruptuara.
“Ka nga ata që, me zell të veçantë dhe motivim politik, bëjnë çmos për të shpikur skandale – jo për interesin publik, por për ta njollosur Qeverinë Kurti, qeverisjen më të ndershme dhe transparente që ka pasur ndonjëherë jo vetëm Kosova, por mbarë rajoni i Ballkanit Perëndimor,” ka shkruar Dalipi.
Ai ka përmendur disa tituj të portaleve që e përmendin atë dhe vëllain e tij në kontekst të licencimit nga ZRRE për tregti me energji, duke i quajtur si shembuj të gazetarisë që udhëhiqet nga interesa të ngushta financiare dhe nostalgji për kontratat njëburimore të së kaluarës.
Për të sqaruar publikun, Dalipi ka renditur disa fakte:
Numri i licencave për tregti me energji nuk është i kufizuar.
Blerja dhe shitja e energjisë bëhet brenda sektorit privat, pa ndërhyrje politike.
Më shumë kompani të licencuara rrisin konkurrencën dhe ulin çmimet.
Bizneset zgjedhin vetë furnizuesin e energjisë.
Kompania e vëllait të shefit të kabinetit të Kurtit licencohet nga ZRRE për furnizim me energji elektrike
Ai ka theksuar gjithashtu se, ndryshe nga qeveritë e kaluara, Qeveria Kurti ka ulur ndjeshëm shpenzimet për media. Sipas tij, gjatë qeverisjes së partive tjera si AAK, PDK dhe LDK, shpenzimet për kontrata njëburimore me media kanë qenë shumë më të larta sesa në kohën e Vetëvendosjes.
“Qeveria nuk blen heshtjen, dhe kjo duket i shqetëson disa,” shkroi Dalipi.
Në fund të reagimit, ai fton qytetarët të mos bien pre e manipulimeve mediatike dhe thekson se historia e tij profesionale është ndërtuar mbi integritet dhe punë të ndershme, përfshirë edhe përvojën në Departamentin Amerikan të Tregtisë.
“Mos lejoni që të manipulohet me emocione dhe tituj bombastikë,” përfundon ai.
Shkrimi i tij:
Mos bini pre e trillimeve dhe insinuatave dashakeqe të disa portaleve dhe politikanëve të opozitës – të njëjtët që janë rritur politikisht në epokën kur korrupsioni ishte rregull, jo përjashtim. Sot, me çdo mjet, përpiqen ta barazojnë Qeverinë Kurti me qeveritë e kapura të së kaluarës, si për të mbjellë idenë se të gjithë janë njësoj. Por nuk janë – dhe këtë dallim e di mirë secili qytetar që ka përjetuar të dy realitetet.
Ka nga ata që, me zell të veçantë dhe motivim politik, bëjnë çmos për të shpikur skandale – jo për interesin publik, por për ta njollosur Qeverinë Kurti, qeverisjen më të ndershme dhe transparente që ka pasur ndonjëherë jo vetëm Kosova, por mbarë rajoni i Ballkanit Perëndimor.
Ja titujt e sotëm të disa portaleve:
– “ZRRE’ja e licencon kompaninë për tregti me rrymë të themeluar nga Luan Dalipi”
– “Kompania e vëllait të Luan Dalipit merr licencë nga ZRRE për tregti me energji”
– “Sa me fat vëllai i Luan Dalipit. E provoi fatin dhe i eci”
Si duket, disa nga këtyre portaleve thjesht po iu mungojnë kontratat/pagesat njëburimore që i kanë pasur dikur.
Për të gjithë qytetarët e interesuar – dhe për ata disa përfaqësues mediash e politikanë që janë mësuar me “korrje” të buxhetit publik gjatë qeverive të mëparshme – po rikujtoj edhe një herë faktet bazike, të cilat disa po bëjnë sikur nuk i dinë:
1. Numri i licencave nuk është i kufizuar, e kjo nënkupton që secili që i plotëson kushtet licencohet. Andaj njoftësia është e panevojshme.
2. Blerja dhe shitja eventuale e energjisë bëhet kryekëput me sektorin privat, andaj nuk ka mundësi përfitimi nga lidhjet eventuale politike.
3. Sa më i madh numri i ofertuesve aq më e madhe është konkurrenca, e më i ulët çmimi i furnizimit. Andaj licencimi i më shumë ndërmarrjeve i ndihmon, e nuk e dëmton konkurrencën.
4. Asnjë biznes nuk obligohet të blejë energji nga një biznes i caktuar, por e zgjedh individualisht furnizuesin.
Dhe për ata që kanë nostalgji për kohën kur mediat “fitonin” më shumë:
Në 17 vitet e fundit, shpenzimet për kontrata njëburimore për media kanë qenë rreth 10 milionë euro. Sipas partive që kanë qeverisur:
AAK: rreth 2,900 €/ditë qeverisje
PDK: rreth 2,000 €/ditë qeverisje
LDK: rreth 1,400 €/ditë qeverisje
LVV: rreth 200 €/ditë qeverisje
Pra, kur i bie që Qeveria Kurti ka shpenzuar 6 deri 13 herë më pak, s’është çudi që disa “gazetarë të pavarur” janë të pakënaqur. Qeveria nuk blen heshtjen, dhe kjo duket i shqetëson disa.
Kërkoni të vërtetën. Mos lejoni që të manipulohet me emocione dhe tituj bombastikë.
#Vlerat → #Sistemet → #Rezultatet
#Kurti3
Ps.1 Për ata që nuk më njohin personalisht: historia ime është ndërtuar mbi punë të ndershme dhe integritet. Kam shërbyer me dinjitet dhe përkushtim në këtë Qeveri tash e katër vjet, por jam po aq krenar edhe për angazhimin tim të mëparshëm në Departamentin Amerikan të Tregtisë dhe më pas në MDA – periudha thelbësore dhe formuese për zhvillimin tim profesional.
Sa i suksesshëm apo produktiv është një njeri në jetë ndikohet nga shumë faktorë – disa prej të cilëve nuk janë as në dorën tonë. Por një gjë e di me siguri: kurrë nuk do të doja të isha në lëkurën e atyre që, me karakter të ligë, denigrojnë të tjerët pa fakte, për motive personale apo interesa të ulëta.
Ps2. Profilet e rreme dhe komentet denigruese e pa argumente, që vetëm derdhin vrer – fshihen.
