Jeton Kryeziu, avokat
Para 16 vjetësh ishim të gjithë të bashkuar për një çështje. Kishim mendime të ndryshme rreth mënyrës të luftës, paqësore apo të armatosur, por gjithsesi ishim të bashkuar.
Të bashkuar si shqiptarë, që nga Shqipëria deri në Maqedoni, që nga Mali i Zi deri në Preshevëdhe Kosovën në mes.
Atëherë na bashkonte lufta për drejtësi, liri dhe barazi. Luftonim për çështjen e popullit shqiptar.
Fatkeqësisht, kjo ndjenjë, ky vullnet për Shqiptarizëm erdhi duke u shuar. Nëse dje fituam luftën, sot jemi duke humbur betejën për drejtësi, liri dhe barazi.
Por, ajo që mua ma thyen zemrën është se kjo humbje e betejës rrezikon angazhimin e diasporës në favor të zhvillimit në vendlindje. Sepse, duhet pasur parasysh se diaspora gjithnjë e më shumë nuk e njeh vetën në vlerat e mbrojtura nga politikanët e sotëm në Kosovë.
Hashim Thaçi, ish-udhëheqës i UÇK-së, ish-luftëtar, po e përdor strategjinë dhe dhunën e isharmikut të tij. Po e përdor kundër opozitës, siç bënte armiku i tij, Milosheviqi. Po e përdor kundër
ish-bashkëluftëtarëve të tij, pra kundër ardhmërisë së popullit shqiptar.
I tmerrshëm ishte komenti në profilin e tij në Facebook disa minuta pas përdorimit të shfrenuar tëdhunës kundër popullatës.
Thaçi nuk është UÇK. Thaçi nuk është PDK. Thaçi nuk është më Thaç. PDK-ja nuk është më PDK.
Të paktën nuk arrin më të përfaqësojë atë që pretendon.
Emrin e kanë të njëjtin si dje edhe Thaçi, edhe PDK-ja, por vlerat e djeshme nuk i kanë më.
E njëjta gjë ka ndodhur edhe me LDK-në. Edhe kjo e fundit i ka ndërruar vlerat.
LDK-ja nuk është Ibrahim Rugovë. Rugova ishte opozita. Rugova ishte i sulmuar. Rugova ka pasur vlera. Rugova ishte shqiptar dhe ka vepruar tërë jetën për Kosovën, për ardhmërinë e Shqiptarizmit. Dikur, Rugova ishte LDK-ja. Sot, LDK-ja nuk është LDK-ja e Rugovës. LDK-ja nuk është më LDK-ja.
Ajo tani po e përdor strategjinë e Millosheviqit. Po e përdor kundër opozitës, pozitë në të cilën ishte vetë dikur, kur ishte kundër pushtetit serb. Një strategji të dhunës kundër ish-luftëtarëve të Kosovës dhe kundër bashkatdhetarëve të saj. Këtë po e bën bashkë me Thaçin. Nëse Rugova dikur ishte LDK-ja, sot LDK-ja nuk është më Rugova. Ky fakt nënkupton që LDK-ja nuk është më
LDK-ja. Edhe pse e mban emrin e njëjtë, ajo i ka ndryshuar thellësisht vlerat e saj.
Motra dhe vëllezër,
ish-partizanë të UÇK-së,
ish-partizanë të PDK-së, i
sh-partizanë të LDK-së,
ish-partizanë të Ibrahim Rugovës, ndër të cilët isha edhe unë:
Emrat e partive politike nuk i ndërrojnë, por i ndërrojnë vlerat e tyre. Ata që i kemi adhuruar, që i kemi mbështetur dhe për të cilit kemi votuar, ose nuk janë më, ose nuk i përfaqësojnë më vlerat
tona.
Përgjegjësinë për situatën aktuale dhe për përdorim të dhunës kundër motrave dhe vëllezërve tanë nuk e kanë vetëm treshja “Thaçi – Mustafa – Veseli”, por e kemi të gjithë ne që ua kemi mundësuar atyre të na qeverisin, që ua kemi dhënë fuqinë për të na sulmuar ne dhe për ta sunduar Kosovën.
Së shpejti do të vijë dita për të votuar sërish. Do të vijë dita për të ndryshuar situatën dhe për të manifestuar në mënyrë paqësore, pa frikë, pa dhunë. Është momenti që të mos gabojmë përsëri kur do të vijë kjo ditë. Të mos i harrojmë njerëzit si Thaçi që bëjnë shaka në Facebook për dhunën e përdorur ndaj motrave dhe vëllezërve tanë.
Çfarë të bëjmë? Kë ta votojmë? Nuk e di! Por e kam të qartë se nuk duhet mbështetur më PDK-në dhe LDK-në. Duhet mbështetur vlerat demokratike, drejtësinë, lirinë dhe barazinë, se vetëm kjo
mënyrë e mbron Shqiptarizmin.
Jeton Kryeziu, avokat.
