Presidenti amerikan Donald Trump nuk e ka hedhur poshtë idenë për të ndjekur një mandat të tretë në Shtëpinë e Bardhë, pavarësisht se Amendamenti i 22-të i Kushtetutës e ndalon atë, duke pretenduar se “ka metoda” për ta arritur këtë dhe duke theksuar se ai “nuk bën shaka”.
“Shumë njerëz duan që unë ta bëj këtë. Por… mendimi im është se ne kemi një rrugë të gjatë për të bërë. Jam i fokusuar në të tashmen”, ka thënë Trump në një intervistë telefonike me Kristen Welker të NBC News të dielën.
Amendamenti i 22-të i Kushtetutës, i cili u ratifikua në vitin 1951, thotë: “Asnjë person nuk mund të zgjidhet në detyrën e Presidentit më shumë se dy herë”.
“Ka metoda që ju mund ta bëni atë”, citohet të ketë thënë presidenti kur u pyet nëse ka strategji në tryezë për ta lejuar atë të kërkojë një mandat tjetër.
Welker përmendi një plan të mundshëm në të cilin zëvendës-presidenti JD Vance do të kandidonte në vitin 2028 dhe më pas “do t’ia kalonte stafetën Trumpit”.
“Epo, kjo është një. Por ka edhe të tjera”, është përgjigjur presidenti, përpara se të refuzonte të shtjellonte një gjë të tillë.
“Unë nuk bëj shaka”, i tha Trump Welker, duke përsëritur se megjithatë, “është shumë herët për të menduar për këtë”.
Trump ka përmendur shpesh një mandat të tretë, duke thënë në një tubim në Nevada në janar se “do të jetë nderi më i madh i jetës sime të shërbej, jo një herë, por dy ose tre herë ose katër herë”, me sa duket duke bërë shaka.
Ai më vonë sqaroi: “Jo, do të jetë për të shërbyer dy herë. Për katër vitet e ardhshme, nuk do të pushoj”.
