![](https://infosot.com/wp-content/uploads/2015/12/mitrovica-veri-asociacio21.jpg)
Një organizatë jo fort e njohur joqeveritare, e quajtur Misioni Humanitar Rus (RHM) është duke vepruar në veri të Kosovës.
Interesante është se kjo OJQ udhëhiqet nga Yevgeni Primakov, një pasardhës i ish-kryeministrit rus, me të njëjtin emër, i cili të mërkurën qëndroi në veri të Mitrovicës
Primakov i riu është pritur në selinë e Zyrës për Kosovë e Metohi të qeverisë së Serbisë, nga drejtori i kësaj të fundit, Marko Gjuriq, është bërë e ditur në një komunikatë për medie, njofton Klan Kosova.
Zyrtari i deleguar nga Beogradi ka thënë me këtë rast se ka njoftuar përfaqësuesin rus për situatën politike dhe atë të sigurisë në Kosovë. Po ashtu, Gjuriq i është ankuar Primakoviq për siç ka thënë, gjendjen e rëndë të popullatës serbe këndejpari.
Vetë rusi, i cili është edhe ndihmës i kryetarit të Dumës, njërës nga dy dhomat e parlamentit në Moskë, ka thënë se OJQ-ja që ai udhëheq, ka ndërmend ta zgjerojë edhe më aktivitetin e saj në Serbi, duke aluduar në pjesën veriore të Kosovës, njofton Klan Kosova.
Sipas tij, RHM aktualisht është duke u angazhuar të ndihmojë institucionet shëndetësore të Republikës së Serbisë në siç është thënë, “Kosovë e Metohi”.
Po ashtu, Primakov ka thënë se kjo OJQ është e përfshirë, me të madhe, edhe në ofrimin e ndihmës për “refugjatët dhe personat e zhvendosur brenda Kosovës”, të cilët, sipas tij, janë hiq më pak se 247 mijë, shumica dërmuese serbë.