Kryetarja e Gjakovës, Mimoza Kusari, ka kritikuar policinë dhe Prokurorinë se s’po tregojnë rezultate në nxjerrjen para drejtësisë të njerëzve që po marrin pjesë në veprimet kriminale ndaj njerëzve të afërt të saj.
Ky reagim i Kusarit vjen pas djegies së veturës së Valon Llukës, të cilin edhe më herët i kishin hedhur në oborr të shtëpisë së tij granatë dore.
“Nuk është më rastësi dhe as e falshme të deklarohet se as pas sulmit të katërt kundër individëve të afërt me mua, nuk ka rezultat, nuk ka të dyshuar dhe nuk ka zbardhje të atyre që fshihen prapa këtyre akteve”, ka shkruar Kusari.
“Burrnia” e hijenave të natës të cilët identifikohen me sulme prapa shpine, me hudhje të fshehta të bombave, me kërcnime kriminale dhe djegie të makinave zgjat deri te momenti kur shteti vendos seriozisht të merret me ta apo vetëm kur një polic me fletëarrest do të ju troket në derë apo në lokal ku i ziejnë idetë kriminale”, ka shtuar ajo.
Ndërkohë, ajo ka dërguar një mesazh për porositësit dhe dorasit e veprimeve kriminale në Gjakovë.
“Frikacak, burreca dhe të ligë, ju do të vazhdoni të identifikoheni me shkatërrimin, krimin dhe errësiren, ndërsa mos harroni se duhet vetëm një qiri të largojë errësiren. Në Gjakovë shumë drita janë ndezur e shumë tjera do të vazhdojnë të ndizen deri sa ju lakuriqët e natës të mos keni vend aty më”.
Gazeta Express ka raportuar sot se vetura e biznesmenit Lluka është djegur, ndërkohë, policia ka thënë se po i vazhdon hetimet.
Lluka në një prononcim për gazetën ka thënë se nuk e di pse po bëhen këto veprime kriminale ndaj tij.
