Kryeministri në detyrë i Kosovës, Albin Kurti, ka marrë pjesë në promovimin e një pulle të veçantë postare të lëshuar nga Posta e Kosovës, me rastin e 250-vjetorit të Pavarësisë së Shteteve të Bashkuara të Amerikës.
Sipas tij, kjo pullë përfaqëson një simbol të partneritetit të ngushtë ndërmjet Kosovës dhe SHBA-së.
“Sot, në Postën e Kosovës, promovuam një pullë të veçantë postare për një datë specifike: shënimin e 250 vjetorit të Pavarësisë së Shteteve të Bashkuara të Amerikës. Kjo pullë përbën një afirmim simbolik të partneritetit të fortë dhe raporteve të shkëlqyeshme ndërmjet dy shteteve tona”, ka deklaruar Kurti.
Ai tha se përmes pullave postare ndër vite është promovuar historia, kultura dhe identiteti i Kosovës.
“Përmes pullave postare, përgjatë viteve, kemi promovuar trashëgiminë kulturore e historike të vendit tonë, luftën tonë për çlirim, bukuritë e pasuritë natyrore të vendit tonë, të arriturat në kulturë, shkencë dhe sport, diversitetin, shoqërinë tonë civile, e tema tjera”, u shpreh ai.
Kurti theksoi se marrëdhëniet mes Kosovës dhe SHBA-së do të vazhdojnë të forcohen.
“Aleanca jonë, partneriteti midis Republikës së Kosovës dhe Shteteve të Bashkuara të Amerikës, do të vijojë të jetojë. Kujtesa e popujve tanë do të mbetet përgjithmonë e shënuar edhe në pullën që po e dedikojmë sot”, tha ai.
