Kryeministri në detyrë i Republikës së Kosovës, Albin Kurti, mori pjesë në takimet rajonale të Njësive për Inteligjencë Financiare, të organizuara nga Egmont Group dhe mbështetur nga GIZ në Kosovë.

Gjatë fjalës së tij, kryeministri shprehu mirënjohjen e Qeverisë së Republikës së Kosovës ndaj organizatorëve për ndërmarrjen e iniciativave dhe mbështetjen në mbajtjen e ngjarjeve si takimet rajonale të Njësive për Inteligjencë Financiare.

“Organizimi i kësaj ngjarje është në përputhje të plotë me programin tonë qeveritar dhe synimet tona për integrim evropian dhe integrim në mekanizmat tjerë ndërkombëtar. Synimi ynë është forcimi i bashkëpunimit ndërkombëtar dhe vendor për të mbështetur dhe koordinuar përgjigjen e gjithë akterëve në Kosovë. Po e bëjmë këtë bashkë për të luftuar pastrimin e parave dhe financimin e terrorizmit duke bërë sa më efektive kapacitetet kolektive për ta parandaluar, identifikuar dhe luftuar krimin ekonomik”, tha ai.

Ai shtoi se përafrimi i objektivave dhe përpjekjeve të Qeverisë me ato të akterëve tjerë do të na ndihmojnë në identifikimin efektiv të kërcënimeve dhe dobësive sistematike dhe forcimin e përgjigjeve tona për zvogëlimin e tyre.

Në komunikatë bëhet e ditur se raporti për Vendin i Bashkimit Evropian nënvizon se Kosova ka bërë progres në luftën kundër pastrimit të parave, raportet e Transparency International të viteve të fundit theksojnë se Kosova ka shënuar progres në luftimin e korrupsionit, Indeksi Global i Krimit të Organizuar tregon se vendi ynë ka bërë progres të theksuar në luftimin e krimit të organizuar, duke renditur Kosovën në mesin e vendeve me nivelin më të ulët të krimit të organizuar në Ballkanin Perëndimor dhe njëherit Iniciativa Globale kundër Krimit të Organizuar Ndërkombëtar në Indeksin Global të Krimit të Organizuar 2025, na vlerëson si shtetin me nivelin më të ulët të kriminalitetit në rajon.

“Kosova ka bërë progres të konsiderueshëm, duke forcuar kornizën ligjore dhe institucionale në këtë fushë me qëllim të luftimit të këtyre dukurive, harmonizimit me standardet evropiane dhe ndërkombëtare dhe zbatimin efektiv të tyre. Kjo qasje forcon më tej bashkëpunimin, kohezionin dhe koordinimin tonë. Njësia për Inteligjencë Financiare e Republikës së Kosovës, ka performuar mirë dhe ka shënuar rezultate të kënaqshme në identifikimin dhe gjurmimin e të ardhurave të paligjshme financiare. Qeveria e Republikës së Kosovës mbetet e përkushtuar në mbështetjen e saj ndaj NJIF dhe autoritetet tjera në luftimin e këtyre aktiviteteve kriminale”, u shpreh kryeministri.