‘El Pais’ është gazeta me tirazhin më të madh në Spanjë. Ky medium ka dërguar gazetarin Antionio Pita që të raportojë për zgjedhjet e jashtëzakonshme parlamentare që u mbajtën të dielën në Kosovë.
Pita ka zhvilluar një intervistë me liderin e Lëvizjes Vetëvendosje, Albin Kurtin pasi ky subjekt doli fitues i zgjedhjeve, shkruan Indeksonline.
Kurti ka folur rreth marrëdhënjeve të shtetit të Kosovës dhe Spanjës, duke shtuar se shteti iberik nuk duhet të ketë frikë nga pavarësia e Kosovës.
“Unë jam shumë i etur t’u shpjegoj elitës politike dhe popullit të Spanjës se ata nuk kanë asgjë për t’u frikësuar nga pavarësia e Kosovës. Njohja e vetvetes nuk është padrejtësi për askënd; përkundrazi, ajo po bashkohet me shumicën e vendeve në Kombet e Bashkuara”
“Kosova nuk duhet të krahasohet me asnjë rajon të Spanjës. Është absurde të përpiqesh ta vendosësh Spanjën në të njëjtën kategori me Serbinë sepse Serbia po zbatonte aparteidin në vitet 1990 që kulmoi me gjenocid në 1999.
“Është një situatë me të cilën askush nuk do të donte të krahasohej ose identifikohej, aq më pak Spanja. Si një vend i BE dhe NATO, kjo njohje është e rëndësishme për ne dhe do të jetë një përparësi e lartë për Ministrinë e Jashtme dhe për mua, si Kryeministër” deklaroi Kurti për El Pais.
