Albin Kurti ka thënë se Lëvizja Vetëvendosje! nuk ka qenë e ftuar për një marrëveshje si ajo e Aleancës për Ardhmërinë e Kosovës dhe Nismës për Kosovën, e nënshkruar sot për koalicion parazgjedhor, ndërsa ka shtuar se ndarja e opozitës do të shtynte zgjedhjet e parakohshme.
Në një intervistë për “Oranews”, Albin Kurti ka thënë se janë të brengosur për “kontaktet që AAK i ka vendosur me njerëzit e qeverisë. Kjo i sposton gjasat që të kemi zgjedhje parlamentare së shpejti, të nevojshme për Kosovën. Nuk na duket e drejtë të bëhen marrëveshje parciale. Jemi të brengosur në veçanti për takimet dhe kontaktet të AAK-së me ata të qeverisë, duke flirtuar”, ka thënë Kurti.
Kurti ka thënë se tek Aleanca për Ardhmërinë e Kosovës po vërehet një zbutje e qëndrimeve.
“Besoj se ka një raport të ri me kryetarin e Kuvendit, Veseli, sepse ndryshe nuk shpjegohet qëndrimi se nuk kanë vija të kuqe për asnjë parti dhe nga ana tjetër ka një zbutje edhe të qëndrimeve dhe të qëllimeve. Ka kaluar koha kur protestat mund t’i thërrasë një subjekt dhe duhet një alternativë e re. Mos harroni se Vetëvendosje! ka 17 deputetë dhe AAK e Nisma kanë 14 deputetë. Nuk e kuptoj se ku duan të shkojnë me këtë marrëveshje”, ka thënë ai.
Albin Kurti ka thënë se Lëvizja Vetëvendosje! po përgatitej për një alternativë qytetare edhe me shoqërinë civile, ide kjo e pranuar edhe nga AAK e Nisma. Por sipas Kurtit, kjo alternativë nuk ka hasur mirëkuptimin e AAK-së, e cila, siç tha ai, nuk i ka ftuar në marrëveshjen e nënshkruar sot me Nismën.
