Deputeti i Lëvizjes Vetëvendosje, Albin Kurti, ka treguar se ftohja e parë në mes të partnerëve opozitarë ka ndodhur kur kreu i Aleancës për Ardhmërinë e Kosovës, Ramush Haradinaj, ka dhënë dorëheqje nga posti i deputetit.
“Në ato momente është ndjerë se ka disa tensione që po dalin në sipërfaqe. Në ato tensione, AAK’ja filloi ta braktisë opozitarizmin si aktivitet”, ka thënë Kurti në Zona e Debatit në Klan Kosova.
Kurti ka folur edhe për Donika Kadaj-Bujupin, e cila ka lënë Alenacën për Ardhmërinë e Kosovës, për t’iu bashkuar partisë së tij.
“Donika Kadaj-Bujupi, para se ta braktisë AAK’në, është ndjerë e braktisur nga AAK’ja”, ka thënë Kurti.
“Donika nuk e braktisi AAK’në, por e braktisi braktisjen”, është shprehur Kurti.
Kurti po ashtu ka thënë se opozita e bashkuar nuk ishte e bashkuar edhe për hapin e radhës, për Alternativën e Përbashkët.
“Ishte i nevojshëm ky hap, një vendimmarrje e përbashkët. Ne kemi kërkuar që të kishim një sekretariat punues që do të merrej me çështje teknike. Kishte nevojë për alternativë politike, me të cilën do t’i paraprinim një liste zgjedhore të përbashkët”.
Kurti ka përmendur edhe kushtet që Aleanca kishin për këtë alternativë dhe arsyet pse Vetëvendosje nuk i ka pranuar ato.
“AAK-ja ka pasur dy kushte për VV-në. Kushti i parë ka qenë që AAK-ja dhe VV-ja të ishin të barabarta në numrin e kandidatëve për listë: 40 kandidatë nga AAK, 40 nga VV dhe 20 nga nisma, e 10 nga shoqëria civile. Ne nuk u pajtuam, sepse VV ka fituar më shumë vota në zgjedhje. U bazuam në numrin e votave që kishim në zgjedhjet e qershorit të vitit të kaluar. Kushti tjetër ishte që VV të mos e jepte kandidatin për kryeministër, mirëpo një gjë e tillë s’mund të ndodhte për shkak se Vetëvendosje është partia më e madhe opozitare në vend”.
