Kryetari i Kuvendit të Republikës së Kosovës, Kadri Veseli, vizitoi sot fabrikën KIVO në Kaçanik, e cila ban prodhimin e amballazheve fleksibile plastike.
Gjatë vizitës, kryetari Veseli u njoh me ambientet dhe me procesin e punës në këtë fabrikë.
Tue e cilësue këtë fabrikë si histori të jashtëzakonshme suksesi, kryeparlamentari Veseli u shpreh i entuziazmuem me punën dhe prodhimin që bahet në këtë fabrikë.
Ai përgëzoi pronarët e saj vendorë për angazhimin dhe përkushtimin e tyne, të cilët kanë arritë të tërheqin investitorë nga Holanda, tue ndërtue sot, siç tha kryeparlamentari Veseli, nji nga projektet ma ambicioze, i cili tanë prodhimin e saj e plason në tregun e Bashkimit Europian, simbas standardeve europiane.
Veseli tha se kjo asht pikërisht çka i duhet sot Kosovës, ndërsa konfirmoi mbështetjen institucionale për projekte të kësaj natyre, të cilat hapin vende të reja pune dhe rrisin prodhimin vendor.
“Ligji për investime strategjike, i miratuem ditë ma parë nga Kuvendi i Republikës së Kosovës, ka mi hapë rrugë ardhjes së investitorëve të ri të huej në vendin tonë. Institucionet e Kosovës janë të përkushtueme që t’ua sigurojnë atyne tana kushtet e nevojshme për investim”, theksoi kryetari Veseli.
Tue e falënderue kryeparlamentarin Veseli për vizitën, drejtori i fabrikës, Visar Ramajli, shpalosi projektin e ri për zgjanimin e kapaciteteve të fabrikës, i cili pritet me përfundue në Dhetor të këtij viti, ndërsa në funksionalizimi i plotë ka me u ba në Fror të vitit të ardhshëm.
Ramajli bani të ditun se në këtë fabrikë aktualisht janë të punësuem 83 punëtorë, ndërsa me zgjanimin e kapaciteteve, ky numër ka me u rritë edhe për 40 të tjerë.
