Ministri i sapoardhur i Punëve të Jashtme në Spanjë, Josep Borrell ka thënë se përfaqësuesit e njerëzve në rajonin e Katalonjës, të cilët duan shkëputjen nga Spanja, duhet ta kuptojnë se Kosova nuk është rast i njëjtë me Katalonjën.
Kryediplomati spanjoll, i cili u emërua në pozitë javën e kaluar me ardhjen e Partisë Socialiste në krye të qeverisë, ka deklaruar se situata aktuale në Katalonjë mund të çojë në luftë civile, dhe se Qeveria e Spanjës do të bisedojë me katalanasit për të ulur tensionet.
“Ne jemi në prag të një konfrontimi civil [Në Katalonjë, v.j]. Unë jam aktualisht duke e lexuar librin e [Quim] Torra-s, i cili thotë se Katalonja është koloni dhe është pushtuar nga Spanja që nga viti 1714. Ai thotë se ‘katalanasit duhet ta përdorin kartën e Kosovës, që ta bëjë Katalonjën të ngjashme me Kosovën dhe ta detyrojnë bashkësinë ndërkombëtare të veprojë”, tha Borrell, në një intervistë për televizionin La Sexta.
“Jamás he dicho que haya que desinfectar a los catalanes, sinó las heridas. Hay que curarlas antes de cerrarlas. Este gobierno, a diferencia del anterior, sí dialogará”. @conjosepborrell #ObjetivoBorrell pic.twitter.com/Tha95rrNxz
— Socialistes PSC/❤ (@socialistes_cat) June 10, 2018
“Nëse dikush dëshiron ta bëjë në Katalonjë një situatë të ngjashme me Kosovën, ata nuk e dinë se çfarë ka ndodhur në Kosovë. Unë nuk do ta doja një gjë të tillë për vendin tim”, ka thënë kryediplomati spanjoll, raporton Insajderi
Emërimi i Borrell si ministër i jashtëm i Qeverisë së kryeministrit të ri Pedro Sanchez nuk ka kaluar pa kritika në Katalonjë.
Një nga kritikat kryesore erdhi nga ish-presidenti i Katalonjës, Carles Puigdemont. Nga Gjermania, ku po pret që të vendoset për ekstradimin e tij për veprën e dyshuar “të rebelimit”, Puigdemont tha se Borrell është një profil që ka ngjallur urrejtje kundër katalanasve. /Insajderi.com
