Institucionet shtetërore dhe ato kulturore të Kosovës kanë dështuar në zhvillimin e teatrit për fëmijë dhe të rinj. Gjatë një viti, me përjashtime të rralla, nuk ofrohen shfaqje për këto mosha në asnjë nga institucionet teatrore apo kulturore. Edhe në ato pak institucione teatrore që ekzistojnë rrallë jepen shfaqje, për shkak të mungesës financiare dhe përkrahjes simbolike që kanë institucionet. Për njohësit e zhvillimeve teatrore në vend, gjendja e përgjithshme që po kalon skena teatrore në vend nuk ka si të mos ndikojë edhe në zhvillimin e teatrit për fëmijë dhe të rinj.
Ikin aktorët
Në një prononcim për “Kosova Sot”, studiuesi dhe shkrimtari Arsim Halili ka thënë se janë krijuesit e trupave profesioniste teatrore ku duhet të kërkohet përgjigjja për moszhvillimin teatrit për këto mosha, jo për të hedhur fajin atyre, por sa ata stimulohen financiarisht. Sipas tij, edhe pak ata aktorë që kanë qenë, e që tërë jetën ia kanë kushtuar këtyre moshave, duket se gjithnjë do te jenë më larg dyerve të teatrit, qoftë për shkak moshës së tyre, apo për arsye të gjetjes së tyre në rrugë alternative.
