Ambasadorja e SHBA-së në Kosovë, Tracey Ann Jacobson, ka thënë se Kosova është shembull për Evropën se si mund të jetë një shtet për komunitetet.
Ajo ka thënë se Qeveria deri më tani ka punuar në avancimin e të drejtave të romëve, porse ende ka punë për t’u bërë në këtë drejtim. “Ju e dini se një milion amerikanë kanë prejardhje rome dhe SHBA-të janë vëzhgues për përfshirjen e romëve dhe që synon diskriminimin e këtij komuniteti. Ne i përgëzojmë të gjithë të arriturat e qeverisë, por duhet bërë edhe më shumë. Ne jemi të kënaqur, por ne besojmë që qasja në arsim është e domosdoshme për të gjitha komunitetet dhe ne kemi avancuar disa qendra për avancimin e arsimit të romëve. Kosova është shembull për Evropën se si mund të jetë një shtet i ri multietnik dhe romët janë një pjesë e rëndësishme e kësaj pasurie dhe e meritojnë ndihmën tonë dhe përkrahjen tonë”, ka thënë Jacobsoni, me rastin e Ditës Ndërkombëtare të Romëve.
Nga ana tjetër, kryeministri i Kosovës, Isa Mustafa ka deklaruar se Qeveria do të angazhohet në punësimin e të gjitha komuniteteve, duke i krijuar kushte edhe në arsim dhe shëndetësi. “Komuniteti rom si pjesë integrale e Kosovës, është kontribuues i shtetit të Kosovës. Kjo festë shpreh edhe vlerat e veçanta që përfaqëson ky komunitet”, është shprehur Mustafa.
Ndërkaq, ambasadori i OSBE-së në Kosovë, Jean-Claude Schlumberger, ka thënë se Qeveria duhet ta përmirësojë gjendjen e tri komuniteteve: egjiptian, ashkali dhe rome. “Ata kanë nevojë për asistencë nga qeveria, për të përmbushur të drejtat e tyre, në mënyrë që të jenë pjesëmarrës si komunitetet e tjera”, ka deklaruar Schlumberger.
Sqarim:
Ndalohen fyerjet dhe përdorimi i gjuhës ofenduese. INFOSOT mban të drejtën e publikimit ose jo të një komenti të caktuar. Përmbajtja e komenteve nuk pasqyron, qëndrim editorial të redaksisë së portalit INFOSOT. Ju faleminderit për mirëkuptimin!
© infosot.com
