Kryeparlamentari Kadri Veseli, duke folur në tryezën e diskutimit për MSA’në, mbajtur sot në Prishtinë, nën organizimin e Grupit për Studime Juridike dhe Politike dhe Institutit i Prishtinës për Studime Politike, ka bërë një ekspoze të angazhimeve të Kuvendit të Kosovës që lidhen procesin e integrimit europian në përgjithësi dhe implementimin e Marrëveshjes së Stabilizim-Asociimit në veçanti.
Veseli ka përmendur krijimin nga Kuvendi i Kosovës të Komisionit Parlamentar për Stabilizim-Asociim, i cili mbledh përfaqësues të të gjitha grupeve parlamentare në Kuvend.
Ai ka theksuar përkushtimin e legjislativit për të përmbushur çdo obligim që del para tij në këtë fazë.
Kryeparlamentari Veseli, poa shtu, ka potencuar vendosmërinë e Kosovës për të vazhduar rrugën e saj përpara në agjendën euro-atlantike, por njëkohësisht ka theksuar domosdoshmërinë që edhe BE të lëvizë më shpejtë në këtë drejtim.
Veseli e ka konsideruar të ngutshme nevojën e marrjes sa më të shpejtë të vendimit nga ana e BE’së për liberalizimin e vizave për qytetarët e Kosovës dhe njohjen e pavarësisë nga pesë vende të BE’së, të cilat ende nuk e kanë bërë këtë.
“Kosova beson në vizionin e Europës. Agjenda evropiane mbetet prioritet yni nacional, për të cilin kemi konsensus të plotë midis subjekteve politike”.
“MSA i ofron Kosovës perspektivë ekonomike, sidomos në aspektin e tregtisë me Bashkimit Europian”.
Veseli, më tutje ka thënë se Kosova ka nevojë të dialogojë me Brukselin, me fqinjët e saj, por njëkohësisht ka nevojë edhe për dialog të brendshëm politik.
Lidhur me këtë, ai ka përsëritur ftesën për grupet parlamentare në opozitë, që t’i kthehen punës së përbashkët në Kuvend.
