Deputeti i Lëvizjes Vetëvendosje, Glauk Konjufca në seancën gjyqësore kundër tij dhe aktivistëve të tjerë të Vetëvendosjes, ka deklaruar se rastin për të cilin po gjykohen ka prapavijë politike.
Ai ka shtuar se pa paralajmërim janë marr në shtëpitë e tyre dhe janë sjell në burg një ditë para protestës së paralajmëruar nga opozita.
“Prandaj nuk kam kurrfarë dileme që qëllimi kryesor i dërgimit në burg është drejtpërdrejtë i lidhur me qëllimin për të na izoluar dhe jo për të bërë drejtësi. Ky grup dhe disa të tjerë kanë mbajt burg për këto çështje dhe sërish po i riktheheni këtij rasti 7 vite pas. Nuk ka ndërlidhje tjetër pos me zhvillimet aktuale politike. Kjo çka po e përjetojmë ne është dëshmi që shefi juaj i vërtetë nuk është Kushtetuta por kryeministri, pasi po të mos ishte kështu, ne nuk do të ishim në sallë”, ka thënë Konjufca.
Ai ka shtuar se politikisht vazhdojnë të jenë kundër sistemit të EULEX-it, i cili është sistem i padrejtë, sepse Kushtetuta jonë thotë që jemi Republikë sovrane, kurse EULEX-i nuk e njeh shtetësinë e Kosovës.
“EULEX-i është një mision i dështuar, qëllimet e tij kanë qenë sundimi i ligjit dhe korrupsioni. Arsyeja kryesore pse jemi këtu është sepse jemi kundërshtarë të Zajednicës. Ky rast duhet të hidhet poshtë, kjo aktakuzë e padrejtë të hidhet poshtë”, tha Konjufca.
Kurse, Dardan Molliqaj tha se ai aksion politik ishte i drejtë dhe i qëlluar, pasi nuk ka drejtësi në Kosovë.
Konjufca, Molliqaj, dhe disa aktivistë tjerë të cilët po akuzohen për dëmtimin e veturave të EULEX-it në vitin 2009.
I pranishëm nuk ishet Xhelal Sfeqla dhe Sali Zyba, por gjithashtu edhe shumica e dëshmitarëve nuk kanë ardhur në gjykatë.
