Misioni i NATO-s në Kosovë, KFOR, ka deklaruar se po i përcjellin nga afër deklarimet e institucioneve të Kosovës lidhur me vendimin e ministrit në detyrë të Punëve të Brendshme, Xhelal Sveçla, për funksionimin e Xhandarmërisë së Kosovës.

Sveçla më 19.05.2026 njoftoi se ka nënshkruar themelimin e grupit punues që do të bëj analizimin dhe propozimin e modaliteteve për funksionimin e Xhandarmërisë.

KFOR thotë se u takon institucioneve që të japin komente më të detajuara

“Jemi duke i përcjellë nga afër deklarimet e vazhdueshme të institucioneve në Kosovë lidhur me këtë çështje. U takon atyre të japin komente më të detajuara. NATO vazhdon të bashkëpunojë me të gjitha institucionet e sigurisë në Kosovë dhe të japë kontributin e saj për siguri të qëndrueshme në Kosovë, në dobi të të gjithëve. Në bazë të Rezolutës 1244 të Këshillit të Sigurimit të OKB-së të vitit 1999, KFOR-i garanton një mjedis të sigurt për të gjithë qytetarët që jetojnë në Kosovë, si dhe lirinë e lëvizjes. Kjo bëhet në çdo kohë, në mënyrë të paanshme dhe në koordinim të ngushtë me Policinë e Kosovës dhe Misionin e Bashkimit Evropian për Sundim të Ligjit në Kosovë (EULEX), secili në kuadër të rolit të vet si reagues të sigurisë”- thuhet në përgjigjen e KFOR-it, për Kallxo.com.

Më tej, KFOR janë shprehur se presin që institucionet e sigurisë të vazhdojnë këtë qasje bashkëpunuese, duke u koordinuar me KFOR-in për të kontribuar në sigurinë në Kosovë.

“Ekipi Këshillues dhe Ndërlidhës i NATO-s (NALT) ka mbështetur zhvillimin e Forcës së Sigurisë së Kosovës (FSK), në përputhje me mandatin e saj fillestar për mbrojtje civile, përmes ngritjes së kapaciteteve, edukimit dhe koordinimit të trajnimeve. Presim që institucionet e sigurisë në Kosovë të vazhdojnë këtë qasje bashkëpunuese, duke u koordinuar me KFOR-in për të kontribuar në sigurinë në Kosovë dhe stabilitetin rajonal, në dobi të të gjitha komuniteteve që jetojnë në Kosovë”- thekson tutje KFOR në përgjigje.

Ministri Sveçla në anën tjetër ka shpjeguar se Xhandarmëria do të funksionojë si Agjencion i MPB-së.

“Xhandarmëria përfaqëson një hap të rëndësishëm në konsolidimin e arkitekturës sonë të sigurisë, me mision të qartë për të garantuar prezencë të fuqishme shtetërore në funksion të ruajtjes së kufinjve, integritetit dhe sovranitetit tonë territorial, mbrojtjen nga terrorizmi, menaxhimin e trazirave me rrezikshmëri të lartë dhe mbrojtjen e infrastrukturës kritike.” – ka shkruar Sveçla në rrjete sociale.

Sipas tij, Xhandarmëria do të forcojë kapacitetin për parandalim, menaxhim dhe neutralizim të kërcënimeve që cënojnë sigurinë e qytetarëve dhe integritetin territorial të vendit.Kurti në një konferencë për media tha se shumë shpejtë me ministrin Sveçla do të bëjnë të ditur detaje lidhur me xhandarmërinë.

“Ka kohë që ne e kemi menduar këtë gjë, për shkak se një aspekt tjetër shumë i rëndësishëm për sigurinë e Kosovës ka të bëjë me një zonë e cila është më shumë se policia e më pak se ushtria. Prej ruajtjes së kufirit, te luftimi i terrorizmit, tek mbyllja e cfaredo shtegu të kontrabandës e deri tek mbrojtja infrastrukturës kritike”- u shpreh ai më 20.05.2026.

Ndërkohë, më 20.05.2026, kryeministri në detyrë i Kosovës, Albin Kurti ka pritur në takim zëvendës ndihmës Sekretarin e Përgjithshëm për Partneritete në NATO, Kevin Hamilton.

Tema të bisedës mes Kurtit e Hamiltonit ishin edhe marrëdhëniet mes Kosovës e NATO-s, siguria në rajon e Kosovë si dhe zhvillimet aktuale politike.

“U diskutua gjithashtu për themelimin e Xhandarmërisë së Kosovës, ku në pyetjen e z. Hamilton, kryeministri në detyrë Kurti shpjegoi konceptin dhe theksoi nevojën e kësaj strukture në forcimin e sigurisë dhe koordinimit me KFOR-in dhe NATO-n në këtë drejtim”- ka njoftuar Zyra e Kryeministrit.Xhandarmëria është një forcë sigurie me status ushtarak që kryen detyra policore dhe të rendit publik dhe konsiderohet si një strukturë ndërmjet policisë dhe ushtrisë.

Shtete anëtare në NATO si Franca dhe Turqia e kanë xhandarmërinë e tyre.

Xhandarmëria Kombëtare Franceze është një forcë ushtarake përgjegjëse për zbatimin e ligjit, e cila ka juridiksion të plotë mbi popullsinë civile gjatë kryerjes së misioneve të policisë gjyqësore, sigurisë publike, rendit publik dhe inteligjencës, duke zbatuar aftësitë e saj të ndërveprueshme policore dhe ushtarake si në territorin kombëtar ashtu edhe jashtë vendit. Xhandarmëria Kombëtare është një mjet për menaxhimin e krizave i aftë të mbulojë të gjithë spektrin e konfliktit, nga operacionet në kohë paqeje deri te misionet e luftës, përmes krizave.

Kurse, Xhandarmëria e Republikës Turke është një organizatë e armatosur e sigurisë publike dhe zbatimit të ligjit, e cila ruan sigurinë, mbrojtjen dhe rendin publik dhe ekzekuton detyrat që i caktohen nga ligjet dhe dekretet presidenciale. Komanda e Përgjithshme e Xhandarmërisë është në varësi të Ministrisë së Brendshme.