Kreu i Kuvendit të Kosovës, Kadri Veseli, në garën e brendshme për kryetar të Partisë Demokratike të Kosovës, do ta ketë një kundërkandidat.
Kadri Veseli nuk do të jetë kandidati i vetëm për kryetar të partisë më të madhe në vend, Partisë Demokratike të Kosovës (PDK), raporton Indeksonline.
Nga sot në këtë garë është edhe Sylejman Kerolli nga Skenderaj, i cili synon të marr postin e të parit të kësaj partie.
Kerolli ka thënë për Indeksonline se vendimin për të kandiduar për kryetar të PDK-së e ka marr duke pasur parasysh se është një parti demokratike dhe e hapur.
“Kam vendosur të kandidoj për kryetar të Partisë Demokratike të Kosovës vetëm se është parti demokratike dhe ka hapësirë më shumë për të qenë transparent. Andaj, nga sot bëj të ditur se unë jam kandidat për kryetar të Partisë Demokratike të Kosovës, dhe me 7 maj do të mbahet konventa e PDK në nivel qendror, ku do të marrin pjesë delegatët e të gjitha komunave të Kosovës, që janë diku rreth 600 delegatë”, ka thënë Kerolli.
Ai duke folur për kundër-kandidatin e tij, Kadri Veselin ka theksuar se ndonëse gara do të jetë e vështirë, pret që të marrë vota në Konventën e partisë që do të mbahet në maj.
“Nuk e di a do të marrë vota të mjaftueshme, mirëpo unë po hy në garë, sepse secili njeri që hyn në garë mendon që në të ardhmen do të marr edhe vota. Ndonëse gara është bajagi e vështirë, duke e pasur parasysh kundër-kandidatin që është pretendent, mirëpo është parti demokratike dhe unë e vlerësoj këtë”, ka thënë Kerolli, duke shtuar se është e drejt e secilit kandidat të konventës të marr pjesë dhe të kandidoj për kryetar të partisë.
Ai ka vlerësuar se përparësitë e tij në garë janë rrethi i gjerë që e ka dhe kontributi që ka dhënë gjatë karrierës së tij për PDK-në.
Kujtojmë se për 16 kryetar i Partisë Demokratike të Kosovës ishte Hashim Thaçi, i cili e la këtë pozitë pas marrjes së postit të Presidentit të Kosovës. Ndërsa Kadri Veseli është pretendenti kryesor për të parin e PDK-së.
