Në emisionin Ora e Fundit në debatin “Ballë për Ballë”, të ftuara kanë qenë dy deputetet e Parlamentit të Kosovës, nga radhët e Partisë Demokratike të Kosovës, Xhevahire Izmaku dhe nga Aleanca për Ardhmërinë e Kosovës, Time Kadrijaj.
Duke folur për mospranimin e Kosovës në UNESCO, Izmaku tha se disa vende më të vërtetë e kanë befasuar me votat e tyre, por ajo tha se faj për dështimin e pranimit në UNESCO ishte edhe i opozitës me veprimet e fundit.
“Nuk është dashur të befasohemi me ata që kanë kundërshtuar, por sinqerisht unë jam befasuar nga disa shtete që e njohin Kosovën dhe kane abstenuar ose kanë votuar kundër”.
“Uroj që ngjarjet e fundit të mos kenë ndikuar në votim, me veprimet e opozitës. Ishte një votë pro Kosovës, që vinte nga Perëndimi dhe një votë kundër që vinte nga Lindja u bë një ndarje e blloqeve”, tha Izmaku.
Kurse deputetja e Aleancës për Ardhmërinë e Kosovës, Time Kadrijaj, e pa si të çuditshme idenë e Izmakut që faj për diçka që është e ngarkuar Qeveria dhe Ministri e Punëve të Jashtme t’i lihet opozitës.
“Është gabim i madh që t’i lihet faji opozitës, pasi opozita nuk ka qenë ajo që është ngarkuar me lobimin për anëtarësimin e Kosovës në UNESCO”.
“Është detyrë e kryeministrit dhe zëvendëskryeministrit që të lobojnë. Është shumë e pakuptimtë që të fajësohet Opozita. Fajtore është Qeveria që nuk ka intensifikuar veprimet e tyre që sot ne të jemi anëtare të UNESCO-s”.
“Jemi të dëshpëruar si subjekt për mospranimin e Kosovës në UNESCO, sepse e besojmë se Kosova duhet të jetë anëtarë e organizatës. Kosova ka shumë monumente historike dhe me ndihmën e UNESCOS do ishin restauruar”, tha Kadrijaj.
Ajo e citoi edhe deklaratën e para ca ditësh të zëvendëspresidentes të Parlamentit Europian Ulrike Lunaçek, e cila “thotë se duhet rishqyrtuar dialogun me Serbinë dhe është shprehur e befasuar me fushatën e Serbisë kundër Kosovës.
Por, Izmaku insistonte se madje disa parti opozitare do të kenë mundur t’i gëzohen dështimit të sotëm.
“Uroj që dy subjektet tjera duke e përjashtuar këtu Aleancën, nuk kanë duartrokitur heshtazi për këtë dështim”, pohoi Izmaku.
Ndërsa në fund të emisionit, duke folur për situatën politike, Kadrijaj tha se “ne do të vazhdojmë bllokadën pasi marrëveshjet janë të dëmshme dhe nëse Opozita nuk do të kundërshtonte kësisoj, marrëveshjet do të kalonin lehtas në heshtje”.
