Bashkësia Islame e Serbisë ka respekt ndaj kryetarit të Serbisë Aleksandar Vuçiq dhe marrëdhënie relativisht të mira me pushtetin në Serbi, thotë myftiu i Beogradit Mustafa Jusufspahiq. Ai thekson se kjo bashkësi fetare do që të merret parasysh edhe mendimi i saj kur bëhet fjalë për Kosovën, transmeton Koha.net.

“Nuk duam të na copëtohet vendi dhe nuk është e drejtë t’i ndahet djepi këtij vendi”, citon “veçernje novosti”, të ketë thënë Jusufspahiq, duke e paraqitur qëndrimin e BIS-it lidhur me këtë çështje.

Është në interesin e Bashkësisë Islame të Serbisë që në këtë vend të ketë më shumë myslimanë e me shkëputjen e Kosovës myslimanët do të mbesin pakicë, thotë ai.

“Këtë, fundja, ia kam thënë edhe ministrit të Punëve të jashtme të Gambisë,e cila po e shqyrton vendimin e vet për njohjen e pavarësisë së Kosovës. Kjo është ajo që ne vërtetë e mendojmë”, ka thënë Mustafa Jusufspahiq.

Ai thekon se me Vuçiqin është i të njëjtës gjeneratë dhe shton se mund t’i thotë krejt çfarë mendon dhe se mendimi i BIS-it merret parasysh kur merren disa vendime të rëndësishme.

“Prandaj do të donim që të merren parasysh edhe mendimet tona kur bëhet fjalë për Kosovën”, ka thënë ndër të tjera ai./koha.net/