Kandidati për deputet nga radhët e Aleanca për Ardhmërinë e Kosovës, Ahmet Isufi, ka vlerësuar lart kontributin e Ramush Haradinaj në shtetndërtimin e Kosovës dhe zhvillimin e demokracisë në vend. Përmes një postimi publik, Isufi tha se Haradinaj ishte vizionar në tranzicionin nga lufta në jetën politike, duke e cilësuar atë “origjinal të papërsëritshëm të traditës kombëtare”.
Ai gjithashtu përshëndeti tranzicionin e udhëheqjes në parti dhe zgjedhjen e Ardian Gjini në krye të AAK-së, duke theksuar se kjo paraqet shembull të demokracisë brendapartiake dhe do të jetë në të mirë të Aleancës dhe Kosovës.
Postimi i plotë:
Në një kohë kur përfunduam misonin për lirinë e Kosovës dhe bëmë transformimin e UÇK-së në TMK, ti kishe idenë e kalimit nga uniforma në jetën civile sepse vendimet për fatin e ushtrisë dhe të ardhmes së Kosovës, do të vareshin nga vendimet politike përmes zhvillimit të demokracisë dhe krijimit të institucioneve të vendit deri në pavarësi.
Me intuitë e qartësi mendimi u bëre vizionari e udhëheqësi i subjektit politik, Aleanca për Ardhmërinë e Kosovës që për 26 vjet kontribuoi në konsolidimin e demokracisë, ndërtimin e institucioneve vitale dhe krijimin e aleancave të qëndrueshme me ata që në momentet vendimtare ishin me ne.
Ti nuk ishe veç kryetar partie, por burrshtetas që përmbush e përfaqëson identitet kombëtar e shtetëror.
Me bindje të thellë në të drejtën e të vërtetën, optimist i palëkundur para sfidave e pengesave dhe thyes i tabuve kur të tjerët kishin dyshime e ishin skeptikë.
Ti ishe dhe mbetesh origjinali i papërsëritshëm i traditës së thellë kombëtare dhe personaliteti i proceseve zhvillimore integruese.
Krejt angazhimi yt është në frymën e lirisë, pavarësisë dhe avancimit kombëtar.
Tranzicioni që aplikove në parti në mënyrën më kolegiale duke i hapur rrugën kryetarit të ri Ardian Gjinit, është shembull i kultivimit dhe i zhvillimit të kulturës së demokracisë brendapartiake.
Duke pasur besimin e plotë, në angazhimet paraprake politike e institucionale të Kryetarit Gjini, me zgjedhjen e tij në Kuvendin e partisë, patjetër që do të fitojë Aleanca dhe Kosova në të ardhmen.
Faleminderit për gjithçka bëre në shërbim të atdheut Ramush, i bindur se bashkëpunimi vazhdon në konsolidimin e forcimin e shtetit e të kombit!
Urime dhe suksese, Kryetar Gjini!
