Deri më tash, Isa Mustafa ka refuzuar të merret me ish-shefin e tij, Fatmir Sejdiun. Por, sot, Mustafa ka thënë se ish-Presidenti s’ka arsye të jetë i pakënaqur pasi vendimet në LDK merren me shumicë të votave. Me gjuhë të njëjtë Kryeministri ka folur edhe për Vjosa Osmanin.
Isa Mustafa ka vendosur t’iu përgjigjet akuzave të Fatmir Sejdiut e Vjosa Osmanit, dy bashkëpunëtorëve më të ngushtë të tij për një kohë në LDK.
Mustafa ka thënë se as ish-shefi i tij dhe as Vjosa Osmani s’kanë arsye të jenë të pakënaqur me vendimet e LDK’së. Ka thënë se vendimet në këtë parti merren me shumicën e votave.
“Ne ju kemi dhënë mundësinë që edhe Vjosa Osmani edhe Fatmir Sejdiu ta thonë mendimin e tyre. Bile edhe shumë më gjatë sesa kanë fol të tjerët. Nuk kanë arsye me qenë të pakënaqur, kanë arsye të bashkëpunojnë dhe të jenë pjesë e këtyre proceseve, sepse askush nuk kuptoj hidhërohet nga vota edhe nga qëndrimi i shumicës”, ka thënë Mustafa.
“Kjo është demokraci dhe duhet të pranohet vullneti i shumicës, vullneti i shumicës është kjo që po ndodh këtu në LDK”, ka shtuar ai.
Isa Mustafa i ka ftohur raportet me Fatmir Sejdiun prej kohës kur mori udhëheqjen e LDK’së. Ndërsa me Vjosa Osmanin prej kohës kur kjo e fundit votoi kundër tij kur lidhi koalicion me PDK’në.
Ndërkohë, Fatmir Sejdiu, sot, ka kërkuar sqarime nga Isa Mustafa se pse dikur ishte kundër PDK’së e SHIK’ut ndërsa tash po thotë se gjithçka me ta është në rregull.
