Veteranët e UÇK-së problemet e tyre nuk do të mund më t’i adresojnë në zyrën për çështje të veteranëve të Luftës së UÇK-së e cila ka funksionuar në kuadër të zyrës së kryeministrit tash e disa vjet.
Kjo pasi që vet kryeministri Isa Mustafa në mbledhjen e sotme të mbajtur në Qeverinë e Kosovës ka vendosur që ta mbyllë këtë zyrë e cila ka funksionuar në kuadër të ZKM-së.
Tash e tutje veteranët për kërkesa të tyre do të mund të adresohen në zyrën e veçantë cila funksionon në kuadër të Ministrisë së Punës dhe Mirëqenies Sociale.
“… vetëm t’iu njoftoj, ne kemi pas disa biseda me Komisionin. Kryetari i Komisionit është pajtuar që kjo të përmbyllet. Mbesin edhe disa çështje që kanë të bëjnë me invalidët dhe me pjesëtarët tjerë që nuk lidhen me veteranë, të cilat do të vazhdohen të kryhen, por do të kryhen në ministritë përkatëse, kryesisht në Ministrinë e Punës dhe Mirëqenies Sociale sepse atje pastaj do të përcillet kompetenca e caktuar dhe përgjegjësitë e përcaktuara për ta.”, ka deklaruar kryeministri Mustafa në mbledhjen e sotme të Qeverisë, shkruan Gazeta Fjala.
Ai ka thënë se veteranët nuk duhet ta ndjejnë vetën të përjashtuar nga procesi I regjistrimit të tyre sepse sipas tij ky proces do të përfundoj.
“..asnjëri nuk do ta ndjej veten se do të jetë i përjashtuar nga ky proces, por ky proces duhet të rrumbullakohet, është propozimi që të përfundohet, të dorëzohen listat dhe ta kemi të qartë se sa është numri i veteranëve të cilët tani bijën në obligim”, ka thënë Mustafa.
Kryeministri ka bërë të ditur se Qeveria do ta shqyrtoj edhe numrin e veteranëve ngase sipas tij Qeveria ka marrë kritika nga FMN-ja për qëndrueshmërinë buxhetore lidhur me skemën sociale.
“Çështje tjetër mbetet që më vonë të shqyrtohet edhe kjo çështje sepse kemi vërejtje shumë të mëdha për qëndrueshmërinë buxhetore nga Fondi Monetar Ndërkombëtar, se këto ndërlidhen me marrëveshjen që e kemi me ta, por nuk është çështje të cilën sot mund ta diskutojmë në Qeveri”, ka shtuar Mustafa./GazetaFjala/
