Ministria e Integrimeve Europiane pranon se deri më tani rezultatet në përmbushjen e kritereve që dalin nga Marrëveshja e Stabilizim Asociimit nuk janë të kënaqshme. Megjithatë zyrtarë të kësaj ministrie shprehen se Kosova do të arrijë t’i përmbush këto kritere.
Ditë më parë Grupi për Studime Juridike dhe Politike ka publikuar një raport në bazë të cilit del se në gjashtë mujorin e parë të këtij viti, institucionet kanë arritur që vetëm 27 përqind t’i përmbushin obligimet që kanë marrë për zbatimin e MSA-së.
Ndërsa, zëvendësministri i Integrimeve Europiane, Ramadan Ilazi ka thënë për lajmi.net se rezultatet e para nuk janë të kënaqshme. Ai ka bërë të ditur se gjatë muajit tetor do të finalizohet raporti për monitorimin e MSA-së.
Ilazi po ashtu ka thënë se plotësimi i kritereve të dala nga nënshkrimi i MSA-së janë obligative dhe se Kosova nuk ka opsion tjetër. Ilazi për lajmi.net ka thënë se zbatimi i kësaj marrëveshje është shumë i rëndësishëm për të ardhmen evropiane të vendit.
