Një adoleshent 17-vjeçar i dënuar me vdekje për vrasje në Iran, është ekzekutuar me varje, thanë të shtunën dy organizata joqeveritare për të drejtat e njeriut.
Hamidreza Azari u var të premten në burgun e Sabzevarit, një qytet në provincën Khorasan i Razavi (verilindor), thanë OJQ-të Hengaw dhe Irani Human Rights (IHR), të dyja me seli në Norvegji.
Iran International TV konfirmoi ekzekutimin e tij. Adoleshenti ishte 16 vjeç në kohën e krimit majin e kaluar, kur dyshohet se vrau një burrë gjatë një zënke, dhe 17 vjeç pardje kur u var, thanë Hengaw dhe IHR, duke cituar dokumentet e konsultuara.
Ekzekutimi i tij është një shkelje e re nga Irani i Konventës së Kombeve të Bashkuara për të Drejtat e Fëmijëve, e cila shprehimisht shprehet se çdo person nën moshën 18 vjeç është fëmijë, theksuan organizatat joqeveritare.
“Irani është një nga vendet e pakta që dënon fëmijët me vdekje dhe ekzekuton më shumë të mitur se çdo tjetër.” – tha IHR, sipas të dhënave të saj, të paktën 68 të mitur janë ekzekutuar që nga viti 2010.
“Në Iran duhet të jesh 18 vjeç për të marrë një patentë shoferi, por duhet të jesh vetëm 15 vjeç për t’u varur.” – vuri në dukje drejtori i IHR, Mahmoud-Amiri Moghaddam, përmes X.
