Ministri i punëve të Jashtme të Kosovës, Enver Hoxhaj ka thënë se vota e deputetëve të Kuvendit, për ratifikimin e marrëveshjes për Demarkacionin me Malin e Zi, do të jetë votë që tregon seriozitet shtetëror.
“Nuk ka kthim mbrapa dhe duhet të sillemi ne një proces të tillë si një shtet serioz. Përmbyllja e shënjimit të vijës kufitare për neve si shtet i ri është një akt i kompletimit të shtetësisë dhe sovranitetit të Kosovës. Përmbyllja e këtij procesi do të bëjë që vija kufitare të shënjohet si kufi ndërkombëtar, dhe me atë ky kufi do të shënohet në hartat e OKB ‘së dhe ky kufi do të depozitohet edhe në data bazën e BE ‘së”, ka thënë Hoxhaj
“Mali i Zi nuk ka pretendime territoriale ndaj Kosovës. Neni i 2 i këtij projektligji në mënyrë të qartë thotë se nëse ka fakte të reja ligjore kjo marrëveshje mund të ndryshohet me pajtimin e palëve”, ka shtuar Hoxhaj
Ai ka thënë se në bazë të gjetjeve që i ka bërë komisioni rezulton që në përputhje me kriteret legale dhe teknike dhe në përputhje me standardet ndërkombëtare, shënjimi i vijës kufitare është një proces i rregullt ku Kosova nuk humb asnjë kilometër të saj./ Express
