Ushtruesja e detyrës së presidentes së vendit, Albulena Haxhiu ka pritu sot në takim Qemal dhe Kozeta Zylo, themeluesit e televizionit “Alba Life” dhe të Shkollave Shqipe “Alba Life” në Nju Jork.
Haxhiu, përmes një postimi në profilin e saj në rrjetin social Facebook, ka shkruar se përmes punës së tyre shumëvjeçare, ata kanë krijuar hapësira ku fëmijët shqiptarë në diasporë mësojnë gjuhën shqipe, njohin historinë dhe kulturën e tyre dhe ruajnë lidhjen me atdheun.
“Angazhimi i tyre ka kontribuar edhe në njohjen zyrtare të gjuhës shqipe nga institucionet e shtetit të Nju Jorkut”, ka shkruar Haxhiu.
Postimi i saj i plotë:
Ishte kënaqësi e veçantë të mirëprisja sot Qemal dhe Kozeta Zylo, themeluesit e televizionit “Alba Life” dhe të Shkollave Shqipe “Alba Life” në Nju Jork.
Përmes punës së tyre shumëvjeçare, ata kanë krijuar hapësira ku fëmijët shqiptarë në diasporë mësojnë gjuhën shqipe, njohin historinë dhe kulturën e tyre dhe ruajnë lidhjen me atdheun. Angazhimi i tyre ka kontribuar edhe në njohjen zyrtare të gjuhës shqipe nga institucionet e shtetit të Nju Jorkut.
Në vlerësim të kësaj veprimtarie, Qemal Zylos ia ndava Medaljen Presidenciale të Meritave, ndërsa Qemal dhe Kozeta Zylos u dhashë një mirënjohje të përbashkët për kontributin e tyre në zhvillimin e arsimit shqip dhe kultivimin e vlerave kombëtare në diasporë.
Puna e tyre vazhdon traditën e gjatë të shqiptarëve të Amerikës, të cilët, brez pas brezi, e kanë mbajtur të fortë lidhjen me atdheun përmes arsimit, kulturës dhe veprimtarisë kombëtare.
