Kreu i AAK’së, Ramush Haradinaj po konsideron se serbët e Kosovës janë duke rënë preh e politikanëve ekspansionit të Beogradit, pasi sipas tij vetë ky komunitet nuk kanë interes të ndërtojnë mure me pjesën tjetër të vendit.
Këto vlerësime ai i dha të enjten, derisa qëndroi tek Ura e Ibrit në Mitrovicë, afër së cilës javës që shkoi filloi ndërtimi i një muri. Haradinaj, i cili u shoqërua nga kryetari i Mitrovicës, Agim Bahtiri, tha se në Kosovë duhet ndërtuar ura e jo mure.

Ja çka tha Ramush Haradinaj:

Sot e vizitova Mitrovicën dhe e pash murin që ishte ndërtuar aty. Është e pakuptueshme se si mendësia provinciale e nacionaliste, në këtë kohë ndërton mure ndarëse. Më mirë do të ishte që ato mjete të ishin shpenzuar në ndërtimin, edhe të një ure në Mitrovicë, e cila do t’i duhet atij qyteti, atij komuniteti.

Prishtina dhe Mitrovica, kanë nevojë të ndërtojnë më shumë ura, sepse fati ynë i përbashkët, janë urat e jo muret.

Kjo një dhe e dyta, Qeveria e Kosovës nuk mund të justifikohet me asnjë gjë, pse ishte shkaktari kryesor i ndërtimit të këtij muri, që tani po na harxhon kohë, nerva e mund që ta rikthejmë në një situatë të pranueshme.

Ndërtimi i mureve, nuk mund të jetë as në interesin e vetë komunitetit serb atje. Ata duhet të mos bien pre e politikave ekspansioniste e nacionaliste të Beogradit, apo të kujtdo tjetër, sepse e ardhmja e tyre është në Kosovë!

Kosova është një dhe e pandashme.

Ramush Haradinaj