Arsenali nuk do të mundë të llogarisë në Shkodran Mustafin të paktën deri në tetor, pasi qendërmbrojtësi shqiptar iu nënshtrua një operacioni të vogël në muskulin e këmbës së djathtë.
28-vjeçari e lëndoi muskulin në fitoren e Arsenalit 2:0 kundër Manchester City në gjysmëfinale të FA Cup më 18 korrik, transmeton Gazeta Express.
Klubi nga Londra veriore konfirmoi të martën se Mustafi e ka kryer me sukses operacionin, pasi u vlerësua shkalla e lëndimit të tij.
Si pasojë, ish-përfaqësuesi i Gjermanisë nuk do të mundë të luajë në finale të FA Cup kundër Chelseat më 1 gusht, që është një humbje e madhe për Arsenalin duke qenë se Mustafi po e rigjente formën e vjetër nën udhëheqjen e Mikel Artetas.
Për më tepër, Mustafi do ta mungojë edhe në fillim të sezonit të ri 2020/21 në Premierligë, i cili nis më 12 shtator.
Në një komunikatë për media, Arsenali konfirmoi se Mustafi synon të rikthehet në stërvitje të plota në tetor. /Gazeta Express/
