Ministrja në detyrë e Drejtësisë, Donika Gërvalla, ka bërë të ditur se ka deponuar kallëzim penal ndaj ministres në Qeverinë e Serbisë, Snezhana Paunoviq, për shkak të deklaratave të saj publike, të cilat i ka cilësuar si nxitje të urrejtjes, përçarjes dhe glorifikim të spastrimit etnik.
Sipas Gërvallës, deklaratat e Paunoviqit përbëjnë një cenim të paqes, sigurisë dhe bashkëjetesës ndëretnike, duke theksuar se në Republikën e Kosovës nuk ka vend për relativizimin e gjenocidit, krimeve të luftës dhe narrativave që justifikojnë spastrimin etnik.
Ajo i referohet një interviste të dhënë më 12 korrik 2026 në emisionin “Neisprićano” të medias serbe Kurir, të transmetuar edhe në platformën YouTube, ku ministrja serbe, sipas Gërvallës, ka deklaruar: “Po të isha unë Sllobodan Millosheviçi, do ta kisha bërë spastrimin etnik të Kosovës në vitin 1998.”
Ministrja në detyrë e Drejtësisë e cilësoi këtë deklaratë si të papranueshme dhe të dënueshme, duke shtuar se justifikimi i spastrimit etnik nuk mund të konsiderohet retorikë e zakonshme politike, pasi bart pasoja të rënda historike, juridike dhe njerëzore.
Gërvalla njoftoi se i ka kërkuar Zyrës së Kryeprokurorit të Shtetit që, në kuadër të kompetencave ligjore, të ndërmarrë të gjitha veprimet hetimore dhe ta procedojë rastin me aktakuzë dhe kërkesë për shqiptimin e dënimit nga gjykata kompetente.
Në reagimin e saj, ajo rikujtoi edhe pasojat e luftës në Kosovë, duke theksuar se Serbia ende nuk ka kërkuar falje për krimet e kryera. Sipas saj, mbi 10 mijë civilë shqiptarë u vranë, 1,565 persona vazhdojnë të jenë të zhdukur, rreth një milion qytetarë u dëbuan me dhunë, afro 20 mijë persona u dhunuan seksualisht dhe mbi 100 mijë shtëpi u shkatërruan ose u dëmtuan rëndë gjatë luftës.
Në përfundim, Gërvalla theksoi se përgjigjja e Kosovës ndaj gjuhës së urrejtjes dhe nxitjes së përçarjes mbetet sundimi i ligjit, duke nënvizuar se institucionet e vendit kanë detyrim kushtetues dhe moral për të mbrojtur rendin kushtetues, dinjitetin e qytetarëve dhe vlerat e lirisë, demokracisë, paqes dhe të drejtave të njeriut.
