Hafiz Gagica, njëri ndër bashkëpunëtorët më të ngushtë të ish-liderit të Lidhjes Demokratike të Kosovës, Ibrahim Rugova, njëherësh udhëheqës shumëvjeçar i kësaj partie në Perëndim ka reaguar ashpër kundër mënyrës së trajtimit që i është bërë sot kryetares së Degës së LDK-së në Gjermani, Donika Gërvalla, të cilës nuk i është lejuar që të marr pjesë në mbledhjen e Këshillit të Përgjithshëm të LDK-së.
Gagica jo vetëm se është distancuar nga, sic ka thënë “sjelljet e pa përgjegjshme të Isa Mustafës dhe tarafit të tij shumë servilë!”, por edhe ka përkujtuar se “Donika Gervalla, ka qenë njëra nga shtyllat kryesore të LDK-së gjatë gjithë viteve më të vështira në të 90-tat dhe vazhdon të jetë zëri autentik i saj”.
Ja çka shkruan, Gagica në reagimin e postuar në profilin e tij në Facebook.
“Me rastin e eksesit të turpshëm që sot i ka ndodhur kryetares së Degës së LDK-së në Gjermani, znj. Donika Gërvalla, me tërheqjen e saj zhagas nga sigurimi i Isa Mustafës, të cilës nuk iu lejue pjesëmarrje në kuvendin e KP të LDK-së, distancohem fuqishëm nga sjelljet e pa përgjegjshme të Isa Mustafës dhe tarafit të tij shumë servilë!
Mbyllja e derës dhe pengimi i kryetares së Degës së LDK-së në Gjermani, znj. Gërvalla, njërës nga veprimtaret më të dalluara të Lidhjes Demokratike të Kosovës që nga themelimi i saj e deri më sot, i ka kalue të gjithë kufijtë e mundshëm politik, njerëzor dhe moral të njeriut i cili me dhunë po qëndron që disa vite në krye të LDK-së rugoviane!?
Siç duket Isa Mustafa me bashkëpunëtorët e tij servilë dhe të dëgjueshëm, nuk po mundet më me e dëgjue dhe me e durue mendimin ndryshe, ngase duke e njohur znj. Donika Gervallën, se ajo do e thotë hapur mendimin e saj rreth rrjedhave brenda LDK-së, duket qartë se nga frika ai ka mbyllur derën, dhe ky është rasti i dytë, mbas rastit në Kuvendin zgjedhor, dhe tani në mbledhjen e sotme të KP të LDK-së!
Ne e dimë shumë mirë, se si I. M. e pastroi listën e KP nga të shumica e atyre që mendojmë ndryshe nga ai dhe klika e tij, dhe tani e ka rrumbullakësue konceptin e tij të shndërrimit të partisë në pronë private dhe personale të tij!
Znj. Donika Gervalla, ka qënë njëra nga shtyllat kryesore të LDK-së gjatë gjithë viteve më të vështira në të 90-tat dhe vazhdon të jetë zëri autentik i saj, gjë kjo e cila po shihet qartë se po i pengon Isa Mustafës. Prandaj, mendoj se është koha e fundit që të ndërmerren hapa konkret në reformimin e LDK-së si dhe për largimin e tij nga kreu i saj të cilin e ka uzurpuar që disa vite Isa Mustafa më strukturat e tij autokratike!
I bëjë thirrje anëtarëve të KP të LDK-së si dhe delegatëve të LDK-së, të distancohen nga veprimet e sotme të dhunës ndaj kryetares së Degës së LDK-së në Gjermani, zjn. D. Gërvalla, një diktaturë e turpshme që e ka instalue Isa Mustafa në LDK!”.
