Kryetari i Zveçanit, Ilir Peci, e ka konfirmuar se ndodhet brenda objektit të Komunës, në zyrën e kryetarit.
Në një prononcim për Gazetën Express, Peci tha se tash gjithçka është nën kontroll.
Ai konfirmoi edhe largimin e flamujve serb nga objekti i komunës, derisa shtoi se në objektin e komunës ndodhen edhe policë, të cilët “janë duke e vazhduar punën e vetë”.
“Po, unë për momentin jam në zyrën e kryetarit, dmth në objektin e Komunës. Mirë, në objekt të komunës gjithçka është nën kontroll. Veç janë hjek do simbole, janë hjek prej zyrës këtu. Për momentin s’ka shumë, tentimi i parë patë ma shumë derisa erdh Njësia Speciale dhe gjithçka u rregullua. Situata për momentin është shumë e qetë mrena në objektin e komunës. Policia janë duke e vazhduar punën e vetë. Po, janë në objekt, në punën e tyre, unë punën time si kryetar komune në zyrën time”, ka thënë Peci për Express.
Sot para objektit komunave veriore, janë mbledhur qytetarë serbë për të penguar hyrjen e kryetarëve të rinj. Situata është tensionuar në Zveçan, ku turma ishte më e madhe dhe pati konfrontim me Policinë.
Policia ka hedhur gaz lotsjellës për ta shpërndarë turmën, ndërkaq janë dëgjuar edhe krisma, që mediat raportojnë se ishin të shok-bombave.
Janë publikuar edhe pamjet e një veture të djegur të Policisë së Kosovës.
Kryetari i Zubin Potokut, Izmir Zeqiri, ka bërë të ditur se ende nuk ka hyrë brenda objektit të komunës. Zeqiri ka thënë se është duke pritur të krijohen kushtet për ta bërë një gjë të tillë. “Akoma nuk jam vendosur në zyrë, në komunë, afër komunës jemi këtu në oborr”, ka thënë për Albanian Post.
Izmir Zeqiri, kryetari i sapo betuar i Zubin Potokut, përmes telefonit. “Po presim të vendosemi në komunë, po rrimë afër tash”. Kurse Erden Atiq, kryetar i Mitrovicës së Veriut, ka dhënë një deklaratë në lidhje me zhvillimet në veri për Kallxo.com
Atiq ka treguar se i ka dëgjuar sirenat, duke shtuar se tashmë ato janë ndalur.
Tutje, kryetari i Mitrovicës së Veriut, që vjen nga radhet e LVV-së, thotë është në objektin e komunës. “Alarmin e kam dëgjuar edhe unë, më herët sepse tani është ndal” –tha kryetari i zgjedhur i Mitrovicës së Veriut. “Po, sot unë jam këtu, në objektin e komunës, në zyrë. Nuk di më shumë detaje, unë jam këtu, po punoj kam takime…” – ka deklaruar Atiq. /Express/
