Deputeti i Kuvendit të Kosovës nga radhët e Lëvizjes Vetëvendosje, Fisnik Ismaili, ka ironizuar me ish-kolegun e tij të partisë, Ilir Deda, i cili ka braktisur VV’në për të formuar një parti të re politike në vend.
Ismaili ka publikuar një fotografi në faqen e tij në Facebook, duke thënë se fotografia, ku ai shihet bashkë me kryetarin e VV’së, Visar Ymeri, ish-kryetarin Albin Kurti, sekretarin organizativ Dardan Molliqaj, kryetarin e Prishtinës, Shpend Ahmeti, dhe nënkryetarin e Prishtinës, Dardan Sejdiu, është realizuar nga një femër, emri i së cilës, sipas tij, “do të bëhet publik së shpejti dhe do ta befasojë skenën politike në Kosovë, dhe jo vetëm”.
Javë më parë, deputeti tashmë i pavarur Deda ishte paraqitur në një fotografi bashkë me kryetaren e Gjakovës, Mimoza Kusari, e cila, sipas kësaj të fundit, ishte bërë nga “personi i tretë që është Kryetari/ja e Iniciativës” së re që Deda dhe Kusari do të bashkëthemelojnë.
Përveç se ka ironizuar me Dedën, të cilin Ismaili e kishte koleg partie edhe në Frymën e Re (FER), që pas një performance zhgënjyese në zgjedhje u bashkua me VV’në, Ismaili duket se ka dashur të dëshmojë se FER nuk do të kalojë në parti të re, por se do të mbetet pjesë e VV’së. /Express/
