Presidenti i pezulluar i UEFA-s, francezi Michael Platini, e përshkroi dënimin ndaj tij si një padrejtësi të madhe që po i bëhet dhe mungesën në Euro 2016 si diçka tragjike.
Njeriu me më tepër influencë në futbollin kontinental deri para pak javësh, është pezulluar me 6 vjet përjashtim nga sporti për shkak të një pagese prej 2 milionë frangash të pajustifikuar që përfshiu dhe kreun e FIFA-s.
Tre herë fituesi i “Topit të Artë”, që nostalgjikët e futbollit e kujtojnë me pseudonimin “Le Roi”, u shpall fajtor për thyerje të Kodit të Etikës dhe kjo nënkupton se ai nuk do të jetë në Europianin në vendlindje këtë verë.
“Euro 2016 është krijesa ime dhe nuk do të jem atje këtë verë. Është e paimagjinueshme që nuk do mund të ndjek këtë turne nga fillimi, diçka që më tërbon dhe që është padrejtësi e madhe ndaj meje”, tha Platini.
Francezi la të kuptohej se po aplikohej një axhendë kundër tij që para zgjedhjeve të FIFA-s, që më pas u fitua nga Infantino.
“Kishte shumë njerëz që ishin kundër idesë time për të qenë lider i ri i Federatës pasi kjo do të kishte sjellë shumë ndryshime në këtë institucion. Këta njerëz kundër meje bënë aleanca të turpshme por kjo është e vërteta”, vijoi Platini.
Ai vlerësoi ndërkohë presidentin e ri Infantino, duke nënvizuar se do ta bëjë FIFA-n më transparente.
