Ceremonia hapëse e Lojërave Olimpike Dimërore Milano-Cortina 2026 u shoqërua me tensione, pasi Team USA dhe zëvendëspresidenti amerikan JD Vance u pritën me fishkëllima dhe brohoritje negative nga një pjesë e publikut italian në stadiumin San Siro. Incidenti ndodhi gjatë parakalimit të delegacionit amerikan, duke krijuar një moment të papritur në një mbrëmje festive për sportin botëror.

Reagimet negative u intensifikuan veçanërisht kur figura e JD Vance u shfaq në ekranet gjigante të stadiumit, në mes të protestave të fundit në Itali kundër pranisë së agjentëve të ICE (Immigration and Customs Enforcement) gjatë Olimpiadës.

Megjithatë, atletët amerikanë, të udhëhequr nga flamurmbajtësit Erin Jackson dhe Frankie del Luca, ruajtën qetësinë dhe vazhduan parakalimin pa reagime raporton Daily Mail.

Ngjarja shkaktoi reagime të shumta edhe në rrjetet sociale, ku shumë shikues shprehën habinë për pritjen ndaj ekipit amerikan. “Team USA duke u fishkëllyer në ceremoninë hapëse… nuk e prisja këtë,” shkroi një përdorues në X.

Pavarësisht polemikave, organizatorët synojnë që vëmendja të zhvendoset te garat sportive, ndërsa Lojërat Dimërore kanë filluar këtë fundjavë.