Kosova, Shqipëria, Bosnja, Maqedonia, Mali i Zi dhe Serbia janë futur në listën e vendeve të sigurta në shtetin e Holandës, që do të thotë se shtetasit e tyre nuk kanë të drejtë azili në Holandë.
Ministri i ri i Drejtësisë në Holandë, Klaas Dijkhoff, i ka shtuar këto vende në regjistrin zyrtar holandez para përpilimit të listës së vendeve të sigurta nga shtetet e BE-së.
Dijkhoff shpreson se ky vendim do të ndalojë shtetasit e Ballkanit Perëndimor që të shkojnë në Holandë.
“Ata që vijnë, shumë lehtë mund të kthehen prapa për shkak se shumica e këtyre vendeve janë nënshkruese të traktatit të refugjatëve të BE-së për vendet e treta të sigurta”, ka thënë ai gjatë një debati në parlament.
Javën e kaluar, rreth 1,700 azilkërkues kanë shkuar në Holandë, shumica nga të cilët kanë qenë sirianë.
