Komisioni shtetëror për shënimin e kufirit me Malin e Zi ka hedhur topin te kryetarët e komunave kufitare, duke thënë se ata nuk kanë pasur vërejtje kur kanë miratuar planet zhvillimore me vijat administrative të komunave të tyre dhe se ato vija administrative janë në përputhje me vijën kufitare me Malin e Zi të përcaktuar nga ky komision.
Përcaktimi i tillë i demarkacionit është kundërshtuar nga ish-kryetari i Komunës së Pejës, Ali Lajçi, i cili ka sqaruar se nuk është çështje e njëjtë përcaktimi i kufirit shtetëror me Planin zhvillimor të një komune, shkruan sot Koha Ditore.
Sipas Lajçit, në Planin zhvillimor të komunës përcaktohet vetëm prona komunale, por në hapësirë të komunës mund të këtë edhe tokë e cila administrohet nga ministritë përkatëse e që nuk përcaktohet në këtë plan.
Ekspertët e shënjimit të kufirit kontestojnë dokumentacionin e Agjencisë Kadastrale të Kosovës. Çfarëdo përcaktimi i kadastrave, duke u bazuar në dokumentet e kësaj agjencie, sipas tyre, është i paqëndrueshëm, pasi që kontestojnë saktësinë e këtyre dokumenteve.
