Presidenti i Këshillit Europian, Antonio Costa, në fjalimin e tij në hapjen zyrtare të Presidencës polake tha se prioritet i saj është siguria e Bashkimit Europian.
“Motoja e Presidencës polake është: Siguri, Europë! Unioni ynë lindi si projekt i paqes pas Luftës së Dytë Botërore dhe ne duhet të forcojmë, edhe një herë, sigurinë tonë për të siguruar paqen në Europë”, tha ai.
Ai tha se vizioni ynë i përbashkët për Europën ka qenë i bazuar në të njëjtat vlera, të njëjtat parime, të njëjtin qëllim strategjik: për të forcuar unitetin e vendeve anëtare, efektivitetin e institucioneve europiane, prosperitetin e qytetarëve europianë, raporton Gazeta Express.
Costa ka lavdëruar rrugën e Polonisë për bashkimin me BE-në 20 vjet më parë dhe e përshkroi atë si gurthemel i mbrojtjes europiane dhe një ekonomi inovative dhe në lulëzim”.
Ai nuk përmendi zgjerimin e Bashkimit Europian në këtë fjalim, por tha se në këtë drejtim Polonia është histori suksesi.
“Polonia është padyshim një nga historitë më të mëdha të suksesit të zgjerimit, investimi më i mirë gjeostrategjik që Europa ka bërë për të garantuar lirinë dhe demokracinë pas periudhave të gjata totalitarizmi. Nuk kam asnjë dyshim se presidenca polake e Këshillit të Bashkimit Europian do të vërtetojë edhe një herë se patriotizmi dhe integrimi europian janë të ndërlidhura. Që presidencat e radhës ruajnë rolin e shteteve anëtare si forca lëvizëse të agjendës strategjike të Bashkimit Europian”.
Ai shtoi se Polonia është një burim qëndrueshmërie në një kohë “kur autoritarizmi dhe populizmi kërcënojnë vlerat tona”.
Costa tha se Ukraina duhet të mbetet prioriteti kryesor i BE-së.
“Këtë vit ne duhet të vazhdojmë të qëndrojmë me Ukrainën – aq sa është e nevojshme, për aq kohë sa duhet, për të fituar një paqe gjithëpërfshirëse, të drejtë dhe të qëndrueshme. E drejta ndërkombëtare duhet të mbizotërojë, për lirinë e popullit ukrainas dhe për sigurinë tonë të përbashkët”.
“Për këtë, ne duhet të vazhdojmë ta shohim mbrojtjen si një prioritet strategjik për Bashkimin Europian. Duke u bërë më i fortë, më efikas, më elastik dhe po, më autonom. Duke investuar më shumë dhe më mirë së bashku, me kreativitet dhe pragmatizëm për të gjetur zgjidhje të reja. Gjithmonë duke punuar për një partneritet dhe bashkëpunim të fortë transatlantik me NATO-n”.
Presidenti i KE-së tha se kjo është arsyeja pse ka bërë thirrje për një takim jozyrtar të liderëve europianë në fillim të shkurtit, kushtuar temës së mbrojtjes.
