Bill Clinton, ish-Presidenti amerikan – shumë i dashur për popullin e Kosovës – nuk është shumë i dhënë pas emaileve, dhe këtë e kishte bërë veç dy herë në dy momente të rëndësishme. Ndër dy emailet e vetme që mban mend të ketë dërguar, njëri ishte për burat dhe gratë të ushtrisë së ShBA-së në bordin e një anijeje në Detin Adriatik, gjatë ndërhyrjes së NATO-s në Kosovë.

Ai kujtoi t’i ketë dërguar një email ish-senatorit të ShBA-së, John Glenn, kur ish-astronauti i NASA-s ndodhej në hapësirë në moshën 77-vjeçare, dhe një tjetër për anëtarët e ushtrisë së SHBA-së në bordin e një anijeje në Detin Adriatik gjatë bombardimeve ndaj Serbisë.

I pyetur nëse kujton të ketë dërguar emaile ndonjëherë, Clinton tha ndër tjera:

“I dërgova një email John Glenn-it, Senatorit John Glenn, kur ishte në hapësirë në moshën 77-vjeçare. Dhe u dërgova një email burrave dhe grave në bordin e një anijeje të SHBA-së në Adriatik gjatë luftës në Kosovë. Që atëherë nuk jam i sigurt nëse kam dërguar ndonjë.”