Cristian Brocchi trajneri i ri i Milanit, u prezantua në Milanello nga administratori i deleguar i kuqezinjve, Adriano Galliani, i cili theksoi se kjo zgjedhje është bërë për të mirën e klubit dhe se do të jenë rezultatet ato që do të mund ta konfirmojnë 40-vjecarin edhe për sezonin e ardhshëm. Ndërsa vetë Brocchi në fjalën e tij premtoi se do të bëjë më të mirën në drejtim të Milanin, duke i mëshuar fort kulturës së punës, e cila më pas do të sjellë rezultatet.
“Nuk kam frikë se do të digjem. Me shumë përulësi dua që t’ia përcoj idetë e mia të lojës kësaj skuadre. Nuk iu premtoj se do do t’i fitojmë shtatë ndeshjet e ardhshme, por thjesht dua që futbollistët e mi të japin 110%. Sigurisht që nuk është e lehtë të bësh gjithcka brenda pak ditësh, por po mundohem që lojtarët t’i kuptojnë idetë e mia.”
Praktikisht, Brocchi ka vetëm dy muaj kontratë, por ky fakt nuk e vë aspak nën presion.
“Në karrierën time si futbollist, aspektin ekonomik dhe kontraktual e kam vendosur në plan të dytë. Nuk më intereson t’i kem shpatullat e ngrohta nga një kontratë, por e mira e Milanit. Nëse gjërat do të shkojnë keq, do të di ta nis nga e para me përulësi, por unë dua të jem trajner i Milanit edhe për sezonin e ardhshëm”.
Por cili është modeli i trajnerit të cilin kërkon të ndjekë Brocchi?
“Në karrierën time kam patur fatin të punoj më trajnerë shumë të mirë. Ata nga të cilët kam mësuar më shumë janë Prandelli dhe Ancelotti. Tani është momenti të shfrytëzoj mësimet që kam marrë prej tyre.”
Trajneri i ri italian e fitoi simpatinë e presidentit Silvio Berlusconi falë stilit të lojës që aplikoi te të rinjtë. Objektivi i Brocchit është kualifikimi në Europa League, nëpërmjet kampionatit, që skuadra të jetë me mentalitetin e duhur në finalen e Kupës së Italisë mdaj Juventusit.
