Posta dhe Telekomi i Kosovës dhe kompania kosovare Bejta Commerce, nënshkruan sot marrëveshje bashkëpunimi, përmes së cilës kjo kompani i bashkëngjitet projektit të përbashkët të PTK-së dhe Qeverisë së Kosovës, për ndihmë familjeve të rrezikuara. Kompania do ta sigurojë tërë zhavorrin e nevojshëm për ndërtimin e 45 shtëpive.
Tashmë numri i shtëpive që do të ndërtohen në kuadër të këtij projekti është ngritur nga 73 në 75, njoftoi drejtori i PTK-së Shqyqyri Haxha, duke sqaruar se realizimi i projektit do të fillojë shumë shpejt.
“Realizimi i projektit do të fillojë brenda një kohe shumë të shkurtër, ndërkohë që ne jemi në kontakt të vazhdueshëm me Qeverinë e Republikës së Kosovës. Ekipe të caktuara të Qeverisë janë duke e bërë identifikimin e kategorive”, ka thënë Haxha me rastin e nënshkrimit të marrëveshjes.
Kësaj ftese, të cilës tashmë iu janë bashkangjitur edhe kompania Lesna, Shoqata e Sigurimeve të Kosovës dhe NIC Holding, me shumë kënaqësi iu është bashkuar edhe kompania Bejta Commerce, ndërkohë që pronari i saj, Basri Kçiku ka shprehur gatishmërinë për ndihmë.
“Bejta Commerce me shumë kënaqësi i bashkohet iniciativës shumë të qëlluar të PTK-së dhe Qeverisë së Republikës së Kosovës, duke dhuruar zhavorr për betonimin e 45 shtëpive për kategoritë e rrezikuara.”, ka thënë Kçiku, me rastin e nënshkrimit të marrëveshjes me PTK.
Projekti i iniciuar nga Qeveria e Republikës së Kosovës me përkrahjen materiale të PTK-së në vlerë prej 500 mijë eurosh, ka për qëllim ndërtimin e fillimisht 45 shtëpive, numri i të cilës tashmë ka arritur në 75 sosh, për kategoritë e të pa strehëve, invalidët e luftës, familjet me gjendje të rëndë sociale, viktimave të luftës dhe minoriteteve.
